KUCHING: Opis Menteri Pemansang Indu, Nembiak Mit enggau Pengelantang Komuniti (KPWK) terus ngayanka pemujur nyungkak pengelantang rayat Sarawak nengah macham penyulut kandang beberapa taun ti udah.
Menteri Pemansang Indu, Nembiak Mit enggau Pengelantang Komuniti (KPWK) Sarawak, Dato Sri Fatimah Abdullah madah pemujur pejalai polisi enggau program opis menteri sereta agensi ke dipegai iya tampak mandangka pengeransing perintah Sarawak nyungkak kualiti pengidup rayat, lebih agi raban indu, nembiak mit, ruang bilik enggau orang tuai.
“Kenyau ditumbuh ba taun 2019, Endowment Fund Sarawak (EFS) udah muka lebih 139,000 akaun ungkup anak mit ke baru ada enggau belanja manggai RM139 juta, lalu Bantu Indai Beranak (BIB) udah meri pemaik ngagai lebih 87,000 penerima enggau belanja ngelui RM39 juta,” ku iya.
Iya madah munyi nya maya bejaku ba Program Anugerah Servis Nyulut (APC), ditu, kena Hari Tiga tu tadi.
Ku iya nerang, Program Subsidi Bayar Belanja Ngibun enggau Pelajar Tumu Nembiak Mit ke dipun ba taun 2023 nyaup ngelempung tating belanja apai indai ke kurang penatai pemisi mungkur 185 palan pelajar tumu nembiak mit enggau agih belanja manggai RM2.5 juta naka ke diatu.
Kelimpah ari nya, ku iya, Geran Ninting Taun Khas 2025 beungkus RM10.58 juta udah diagih ngagai lebih 2,000 institut ba selampur Sarawak dikena ngenegap kualiti pelajar awal.
“Ba pekara ngintu pengelantang, Program Sejambak Kasih mujur ngagih belanja lebih RM5.6 juta ngagai sida ke patut serimbai pengerami ngintu lima hari besai.
"Pia mega Kenyalang Gold Card (KGC) ke diberi khas ungkup orang tuai majak ngerembai enggau lebih 333,000 kad dichelak naka Julai, nyengkaum Bantu Pemati sepenyampau RM70.7 juta kenyau ari taun 2020," ku iya.
Iya madah baru, KPWK nengah Opis Indu enggau Ruang Bilik Sarawak (JWKS) bela mandangka empas besai ba ngenegap indu, entara iya nengah Bantu Tuai Ruang Bilik Indu Sarawak (KIRWaS) ke meri modal dagang ngagai semak 1,900 orang indu.
Ku iya nerang Dato Sri Fatimah, pemujur inisiatif tu diaku ba renggat nasional lebuh udah nerima anugerah Projek Silver serimbai Kongres Social Synergy 2025 di Kuala Lumpur.
Kaunsil Pemansang Rama (MPS) bela ngerikod tikas pemanah ti meransang lebuh udah bejalaika lebih 600 siri intervensyen rama sepemanjai 2024, nyengkaum mantu ruang bilik kurang penatai pemisi lalu ngenegap kerejasama enggau macham raban ba mutar isu rayat.
Maya program nya, bisi 41 raban opis menteri enggau agensi dirami ke penyulut sida, nyengkaum lapan penerima ari KPWK, 27 ari Opis Pengintu Pengelantang Mensia Mayah Sarawak (JKMS) enggau enam ari JWKS.
Program nya mega ngenang jasa tiga pegawai ke udah pinchin sereta dua pegawai ti belidar gawa ngagai opis bukai.
Sama datai, Sapit Menteri Pemansang Indu enggau Nembiak Mit Datuk Rosey Yunus, Sapit Menteri Pengintu Pengelantang Komuniti Datuk Mohammad Razi Sitam, Sekretari Mendam KPWK Datu Felicia Tan Ya Hua, Direktor Opis Pengintu Pengelantang Mensia Mayuh Sarawak (JKMS) enggau Direktor Opis Indu Enggau Ruang Bilik Sarawak (JWKS) Salmah Jobeli enggau temuai dipebasa ke bukai.-EDISI UKAS
