KUCHING: Opis Land and Survey (JTS) Sarawak ukai semina ngesan tanggungpengawa nyadi pengatur tanah, tang mega ngemuntang ke pengawa nentuka inisiatif pemansang strategik kandang menua tu mujur dipejalaika.

Sekretari Perintah Sarawak, Datuk Amar Mohamad Abu Bakar Marzuki nyemetak madah, pengelandik JTS amat beguna ba nyaup macham projek pemansang ke meri empas terus ngagai rayat.

“JTS besai amat reti, ukai semina nyadi pengatur tanah, tang mega nyaup ngemuntang pemansang nengeri.

“Opis tu nentuka pemansang strategik Sarawak baka pengawa ngaga jalai alun, jematan, bekal ai enggau karan ulih tembu nitih spesifikasyen sereta dalam kandang timpuh ke ditetap,” ku iya.

Iya madah munyi nya maya ngenataika jaku lalau serimbai Hari Inovasyen enggau Integriti Land and Survey (HITS) Opis Land and Survey (JTS) Sarawak 2025, ke diatur di sebuah hotel, ditu, kena Hari Tiga tu tadi.

Datuk Amar Mohamad Abu Bakar nyemetak madah, aktiviti nyukat enggau ngempu tanah ke diputar JTS meseti majak ditegap ngambi opis pengatur bukai uluh berengkah ngaga projek ba timpuh ti udah dilanggur, lalu nyeliah sebarang pengelaun.

Nambah ke jaku iya, iya madah, JTS enda tau tepantup ati pia aja enggau pemujur diatu laban rayat majak nagih servis ti jampat, efisyen sereta manah.

“Inovasyen ukai semina nengkebang sistem baru, tang mega bekaul ngemanah proses gawa, ngerumban bulih pemendar, ngurangka macham birokrasi enggau ngenatai servis perintah ti efisyen agi,” ku iya madah baru.

Sama datai, Sekretari Mendam Opis Menteri Pengeraja Asal enggau Pemansang Mengeri (MUDeNR) Datu Abdullah Julaihi, Direktor JTS Sarawak Awang Zamhari Awang Mahmood sereta temuai dipebasa ke bukai. -EDISI UKAS