KUCHING: Orang gawa perintah di Sarawak dilalau seruran ngemeran ulah integriti enggau semangat siti tim maya bejalaika pengawa dikena nentuka servis perintah ke dikenatai meruan relevan sereta nyadi pugu pemansang kandang menua.

Sekretari Perintah Sarawak, Datuk Amar Mohamad Abu Bakar Marzuki madah, integriti ukai semina bekaul enggau isu makai suap tauka ngerumpang pengarap aja, tang mega nyerangkung kaul manah enggau pangan diri, tuai enggau tim sama gawa.

“Enti ati kitai gawa semina ka ngiga pangkat, dipuji, dibasa aja, budaya negatif deka nyadi baka bejaku ke pangan diri, enda lurus, bechiping lalu budaya tu amat enda manah ba servis perintah,” ku iya nyemetak ke jaku.

Iya madah munyi nya maya meri jaku lalau serimbai Hari Inovasyen enggau Integriti Land and Survey (HITS) Opis Land and Survey (JTS) Sarawak 2025, ke diatur di sebuah hotel, ditu, kena Hari Tiga tu tadi.

Kelimpah ari nya, iya mega nyemetak madah, orang ke gawa perintah patut bekereja dalam siti tim ke beserakup lalu nyeliah enti sema bisi enda seati laban semina nengah kerejasama rat, servis perintah ulih dikemanah ke agi.

“Semua tu patut dikemeran tetiap raban servis perintah, nyengkaum, Opis Land and Survey, dikena nambahka penemu sereta pengulih ngambi opis meruan relevan lalu nyadi pelasar pemansang Sarawak,” ku iya.

Maya program nya, Datuk Amar Mohamad Abu Bakar bela nyuaka setipikit Anugerah Servis Nyulut (APC) ngagai 100 iku staf JTS ari pampang Kuching, Kota Samarahan enggau Serian.

Sama datai, Sekretari Mendam Opis Menteri Pengeraja Asal enggau Pemansang Mengeri (MUDeNR) Datu Abdullah Julaihi, Direktor JTS Sarawak Awang Zamhari Awang Mahmood sereta temuai dipebasa ke bukai. -EDISI UKAS