KUCHING: Kerejasama strategik Yayasan Sarawak enggau Unit Komunikasi Awam Sarawak (UKAS) ulih ngenegapka bemacham inisiatif pelajar dipejalaika Perintah Sarawak datai ngagai rayat.

Nimbal manah kerejasama nya, Direktor Yayasan Sarawak, Datu Mohamad Junaidi Mohidin madah UKAS udah ngesan tanggungpengawa besai nyaup Yayasan Sarawak ba ngerembaika penerang bemacham program ke diatur sida.

Ku iya, pengeransing dipejalaika Yayasan Sarawak setipak enggau penau bala tuai nengeri ke deka nempa modal mensia bepengelandik ti ulih nyungkak Sarawak nyapai visyen nengeri mansang manggai taun 2030.

"Pelajar sebagi ari pekara ti amat dikemerat rayat.

“Ngadaka modal mensia sigi besai amat reti. Nya alai ba pekara tu, Yayasan Sarawak nyaup meri bantu ngagai nembiak kitai ke nampung pelajar ba macham renggat," ku iya.

Iya madah munyi nya maya nerima penemuai basa ari deligit UKAS ti betuai ke Direktor UKAS, Awang Putrayusrie Awang Redzuan di Indai Opis Yayasan Sarawak, ditu, kena Hari Tiga tu tadi.

Ku iya, tanggungpengawa ke dipegai UKAS ba ngenataika macham inisiatif perintah nengeri, lebih agi pejalai pelajar enda bebayar ke deka berengkah taun dudi besai amat reti.

Nambah ke jaku iya, Datu Mohamad Junaidi madah, kerejasama UKAS sigi beguna endar ngambi rayat ba menua pesisir nemu pekara ke dipejalaika sida.

Dikena nentuka inisiatif nya datai ngagai raban ke patut, Yayasan Sarawak, ku iya, bela seruran ngabas menua pesisir bejalaika macham program pelajar. - EDISI UKAS