KUCHING: SeDidik Centre of Excellence (SCoE) Talent Hub di Jalan Kulas ditu, disadang nyadi 'one stop hub' nyerungkai sereta nyungkak pengelandik nembiak mit Sarawak nengah macham program holistik ke dilangkar khas ungkup sida.

Menteri Pemansang Indu, Nembiak Mit enggau Pengelantang Komuniti Sarawak, Dato Fatimah Abdullah madah, ari penumbuh palan nya, SeDidik bisi pengulih nyadi palan pelajar tebilang ke nyendiaka peluang pemansang ti komprehensif nyikap nembiak mit napi penguji dudi hari.

“Nengah saup sereta kerejasama strategik bala mayuh, kitai ulih bejalaika program inovatif enggau bisi strategi ti deka nyungkak kualiti pelajar tumu nembiak mit lalu ngenegap tanggungpengawa SeDidik ba komuniti,” ku iya madah maya bejaku ba program nya ditu, Hari Tiga.

SCoE Talent Hub nyendiaka macham program nyengkaum Kinder Music, Kinder Gym, Kinder Martial Arts enggau Kinder Culture & Arts kelimpah nengkebang inisiatif baru baka Young Orator enggau Young Writer ti meri perati pemansang pengandal diri, pengelandik bejaku sereta kreativiti nembiak mit.

Inisiatif Young Orator diatur enggau kerejasama Toastmasters Club nyengkaum woksyop komunikasyen enggau iring tuai, lalu Young Writer bisi nerima sukung Singapore Book Council (SBC) ke mujur ngempuru lebih 170 penyereta ari selampur zon alai mandangka pengelandik nulis.

Kelimpah ari nya, SCoE mega mujur ngerejista diri nyadi penyelak ba Library Menua Malaysia nengah kerejasama Sinaran Ilmu Learning & Consultancy, ke nyadika pengelandik ke ditulis nembiak mit dichelak.

Program ke dipejalaika nya ngemerat pemesai guna belajar nengah aktiviti fizikal, muzik, seni enggau budaya dikena ngadaka nembiak mit ti kreatif, mereti sereta bepengerai.-EDISI UKAS