KUCHING: Belajar bekaul Artificial Intelligence (AI) patut dipasuk ba silibus sekula.

Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn madah, inisiatif nya dikena nentuka AI enda salah kena lalu enti diguna meseti ngena atur sereta moral ngambi nadai pekara enda dikeingin nyadi.

"Sida (nembiak sekula) meseti nemu, sida meseti belajar ari pun. Aku enda ulih ngaduka nya (nyadi Menteri Pelajar di Sarawak), silibus nya meseti digaga Opis Menteri Pelajar Malaysia.

"Sida patut nyendia siti subjek baru lalu kebendar iya mayuh subjek ke bisi diatu baka subjek 'Reka Bentuk dan Teknologi' ke alai subjek nya ulih diubah nyadi subjek bukai nyengkaum AI," ku iya.

Iya madah munyi nya maya dirandau pemberita pengudah bejadika Program 'AI Driven Talent: Shaping the Future of Sarawak Workforce Development' ditu, Hari Tiga.

Nambah ke jaku iya, iya madah, sekeda universiti di Eropah udah berengkah nyendiaka kus bekaul AI ke mega berati pengeransing nagang pengawa salah guna.

Berebak enggau nya mega, Dato Sri Roland madah, perintah Sarawak majak ngemerat pemansang pengereja pengawa dikena nentuka rayat nengeri tu besedia ngambi peluang ba industri baru, lebih agi ba bidang teknologi gadung enggau kuasa ulih dikena baru bekenaka AI.

Ku iya nerang, industri tu patut nyikap diri laban deka nyendia servis enggau nengkebang industri baru.

"Kitai bisi institusyen, universiti sereta mega palan teknikal ke besedia meri latih nyengkaum nambah pengelandik.

"Ba sida graduet, sida mega patut belatih baru (reskilling) lalu nambah pengelandik (upskilling) ngambi majak relevan ngira pemansang polisi ekonomi maya hari tu,” ku iya.

Bela datai, Sapit Menteri Pelajar, Inovasyen enggau Pemansang Penau Sarawak Datuk Dr Annuar Rapaee enggau Datuk Francis Harden Hollis, Sapit Menteri Kuasa enggau Pemeruan Rampa Menua Sarawak Datuk Dr Hazland Abang Hipni sereta temuai dipebasa ke bukai. -EDISI UKAS