KUCHING: International Data Centre Authority (IDCA) ke bepalan di Washington nyendiaka pengelandik dikena nyaup Sarawak ngemansangka ekosistem ekonomi digital ti meruan sereta tan dudi hari.

Head of ASEAN (IDCA), Md Shahriman M Sidek madah, tuju penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg dikena nerang tanggungpengawa IDCA ke nyendia servis pengelandik polisi ekonomi digital ngagai perintah enggau korporat di Kompleks Satria Pertiwi, Hari Tiga.

“Dikena nentuka ekonomi digital ngerembai mansang, tu begunaka infrastruktur ti tegap, nyengkaum tiang pemanchar telekomunikasyen, palan data sereta kaul antarabansa nengah kabel optik enggau kabel dalam tasik. Premier Sarawak nyemetak madah, Sarawak ukai semina patut ngembuan hab digital tauka palan data tang mega sistem penyambung antarabansa ti chukup.

“Premier Sarawak mega nemu pemesai reti infrastruktur digital. Nya alai, kami di IDCA sedia mantu nisih sereta ngenegap perambu pemansang tu ngambi amat ‘future proof’, lebih agi ba pekara palan data.

“Sarawak benung berati pemansang hab palan data, lalu pekara bekaul guna kuasa enggau pemeruan bela disebut ba randau kami,” ku iya nerang.

Bela datai ba program nya, Sekretari Mendam Opis Menteri Utiliti enggau Telekomunikasyen Datu Jafri Lias, Menijar Besai Sarawak Multimedia Authority (SMA) Dato Dr Anderson Tiong Ing Heng sereta Direktor Projek Khas IDCA Johnson Yu Weng Lok.—EDISI UKAS