BINTULU: Pejalai Program Perambu Integrasyen Nembiak Ungkup Penyerakup (RIMUP) di sekula primari selampur Sarawak nyadi pelasar dikena nerenak ulah beserakup, pengelantang sereta kerejasama ba raban nembiak pupu bansa enggau asal penatai.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madah, program baka tu ukai semina ngenegap kaul nembiak, pengajar enggau peranak menua dia, tang mega mantu ngadaka rebak ke bisi kualiti ti ulih nyaup pemansang nengeri.
“Kitai patut bekerejasama, kitai beguna penyerakup ti rat. Apai indai mega ngesan tanggungpengawa besai nentuka anak diajar enggau manah, ukai semina ba akademik tang mega ulah sereta disiplin sida,” ku iya.
Iya madah munyi nya maya bejadika Program Peransang Lantang Begulai Enggau Tuai di Sekula Primari (SK) Batu Tellingai, Suai, ditu, kena Hari Dua tu tadi.
Kaban Kunsil Nengeri (ADUN) Kemena nya mega bela nyemetak madah pemesai reti pemansang modal mensia nyadi pelasar pemansang nengeri.
Ku iya nerang, pelajar ti bisi kualiti enggau langkar ulah nembiak patut diperati ngambi rayat enda tinggal ari arus pemansang deras menua.
Iya mega ngenang baru transformasyen SK Batu Tellingai sepemanjai lima penggal iya nyadi pengari sitak nya madah, kerejasama rat apai indai, sekula enggau nembiak nyadi penyungkak nempa pemujur.
“Pemujur nyamai dijapai, tang meruan mujur ukai pekara ti muntang,” ku iya madah baru.
Kelimpah ari nya, Dato Sri Dr. Stephen bela bekunsi inisiatif Gabungan Parti Sarawak (GPS) ke deka nyendiaka bayar belajar enda bebayar dikena masuk ngagai universiti enggi perintah Sarawak berengkah 2026.
Ku iya, inisiatif tu siti peluang besai ungkup peranak nengeri nampung pelajar lebih agi ba bidang teknikal baka Sains, Teknologi, Injiniring enggau Matematik (STEM).
Berebak enggau nya, iya ngelalau apai indai ngambi seruran matau kaul nembiak ba aktiviti sekula lalu nyeliahka sida ari pekara rama ke enda manah.
Program nya bela digulu Residen Sitak Bintulu Datu Nyurak Keti, Pegawai Pelilih Sebauh Thadeus Ling Bartholomew Allu, Kepala Pengajar SK Batu Tellingai Bakir Jatan sereta Yang Dipertua Gerempung Apai Indai enggau Pengajar (PIBG) SK Batu Tellingai Tuai Rumah Bakom Ligong.-EDISI UKAS
