DENMARK: Perintah Sarawak nengah Opis Menteri Industri Pemakai, Komoditi enggau Pemansang Kandang Menua Sarawak (M-FICORD) udah ngatur penemuai gawa ngagai Denmark ari 8 ngagai 17 Ogos 2025 dikena belajar teknologi nupi jelu moden enggau peluang meranak puku ba industri jani.
Penemuai nya betuai ke Menteri ari Opis Menteri nya, Dato Sri Dr Stephen Rundi Utom ti bisi nemuai ngagai sekeda kompeni enggau palan tebilang nyengkaum Big Dutchmen ke mekal perengka ngaga pemakai jelu, Danish Food enggau Veterinary Council ke ngatur pengawa nupi jani, Indu Opis DanBred ke nyadi kompeni murih jani pemadu besai di Denmark, sereta Techocollege ke nyendiaka latih ba bidang nyayat jani.
Deligit Perintah Sarawak nya bela ngabas pengawa Danish Finest Chicken ke ngeluar manuk halal enggau Danish Crown di Horsens.
Tuju penemuai nya dikena belajar ke teknologi pemadu baru, pengawa manah ba industri betupi sereta chara nagang penyakit baka African Swine Fever (ASF) enggau Foot and Mouth Disease (FMD).
Deligit mega diberi penemu senentang teknologi robotik enggau inovasyen ke selalu dikena di Denmark ngulih ke purih jani.
Denmark sebagi ari menua pengeluar dagin jani pemadu besai ba Eropah enggau penyampau jelu tupi manggai 11.45 juta iku ba taun 2024, nyaup 30 peratus sektor betanam betupi menua nya.
Menua nya mega ngatur eksport 90 peratus ari penyampau ke dikeluar ngagai 140 buah menua nyengkaum Jerman enggau Poland.
Nengah penemuai tu, Sarawak ngembuan juluk ati deka ngelangkar pelin pemansang industri betupi jani ti meruan agi sereta matak pengawa meranak puku baru, setipak enggau juluk ati nempa Sarawak nyadi ‘net food exporter’ ba taun 2030.
Naka ke diatu, Sarawak udah ngatur eksport sepenyampau 122,400 iku jani idup beungkus RM197.6 juta ngagai Singapura, lalu enggau saup tiga kompeni pengeluar, penyampau eksport disadang manggai RM1 bilion ba taun 2030.
Sama bisi ba penemuai nya, Sapit Menteri M-FICORD Datuk Martin Ben, Direktor Servis Veterinar Sarawak Datu Dr Adrian Susin, Direktor Opis Betanam Betupi Sarawak Dominic Chunggat, Menijar Besai SALCRA Joseph Blandoi, Menijar Besai SLDB Profesor Dr Harry Entebang, Direktor UPM Sarawak Profesor Dr Shahrul Razid Sarbini, Tuai Bagi Polisi M-FICORD David Branch Ambor, Sapit Direktor Servis Veterinar Sarawak Dr William Rovina Nating. -EDISI UKAS
