KUCHING: Sarawak majakka pengeransing mandangka pengaya daya idup ke nyadi pesaka berega nyaup nyungkak tikas industri dagang temuai sereta ngenegap identiti bansa.

Menteri Dagang Temuai, Industri Kreatif Enggau Seni Pemerindang Dato’ Sri Abdul Karim Rahman Hamzah madah, lebih 40 raban bansa bisi di Sarawak ukai semina nempa menua ke lantang sereta likun tang mai nengeri tu nyadi palan ke ditapat temuai antarabansa.

“Sepemanjai bisi di Kuching, aku meransang bala penyereta ngambi nemu semak agi pesaka budaya menua tu baikka nengah pemakai asal, pemerindang seni, interaksyen enggau rayat tauka ngelawa palan besejarah."

“Aku andal peneleba tu deka meri penemu silik agi senentang reti idup enggau raban pupu bansa,” ku iya.

Iya madah munyi nya maya bejadika Malam Aspirasyen Pesaka 2025 ke diatur di Balai Budaya, Dewan Bahasa dan Pustaka (DBP) Pampang Sarawak kena Hari Dua tu tadi, serimbai Konferens Ngalih Jaku Antarabansa 2025 ke ngempuru penyereta ari dalam enggau menua bukai.

Awak nya bela dikena iya ngelalau raban nembiak ngambika semampai bebasa sereta ngintu pesaka daya idup ti nyadi kelai identiti bansa taja betapi enggau penguji dunya maya hari.

Dato Sri Abdul Karim bela meri terima kasih ngagai pengatur enggau penyereta konferrens laban udah nyendiaka pelasar alai bekunsi penemu sereta ngenegap kerejasama entara raban pakar bidang bekaul ba renggat serantau sereta global.

“Aku ngarap konferens tu ngepun kerejasama ti rat agi, inovasyen ti kreatif agi sereta pengulih penemu ti lebih nyulut ba dudi hari," ku iya madah baru.-EDISI UKAS