KUCHING: Kerejasama strategik Unit Komunikasi Awam Sarawak (UKAS) enggau Sarawak Energy Berhad (SEB) majak ditegap nangkan UKAS dipinta nyadi bakih media Forum Pemeruan enggau Kuasa Ulih Dikena Baru (SAREF 4.0) ke diatur kena 3 ngagai 4 September 2025 ba Palan Konvensyen Borneo Kuching (BCCK).
Direktor UKAS Awang Putrayusrie Awang Redzuan madah, UKAS deka mantu promosyen sebedau, benung sereta pengudah konferens nengah macham platform nyengkaum portal berita enggau platform media rama UKAS.
Ku iya nerang, tanggungpengawa tu deka nyungkak naratif Sarawak nyadi penengkebang kuasa ulih dikena baru di rantau tu seriris enggau juluk ati PCDS 2030 enggau tuju penumbuh ASEAN 2025.
Berindik ari nya, Menijar Besai Komunikasyen Korporat SEB, Elaine Tan madah, SAREF 4.0 sekali tu ngangkatka rambai jaku 'Partnership for the Goal' enggau kaul tukuh serantau enggau antarabansa, nempa program nya nyadi sebagi ari program iring tuai ke bisi buah runding kuasa ungkup timpuh sepuluh taun.
Ku iya, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg deka datai nyadi temuai dipebasa ba program 'fireside chat', lalu program nutup konferens deka dipenyadi Sapit Menteri Besai, Dato Sri Fadillah Yusof.
“Naka tu, lebih 650 deligit udah ngerejista lalu kitai merambu matak 1,000 penyereta datai ba konferens nya," ku iya madah pengudah ngatur penemuai basa ngagai UKAS, ditu, kena Hari Dua tu tadi.
Ku iya, konferens sekali tu mai lebih 97 pengelicha enggau enam bagi pleno, woksyop bekaul standard pemeruan hidro sereta randau begulai enggau tuai utiliti ASEAN.
Sebagi ari batang pekara ke diberi perati nyengkaum randau bekaul Grid Kuasa Borneo, idar kuasa, pemansang mengeri meruan kelimpah pekara undang-undang enggau belanja kuasa.
Nambah ke jaku iya, Elaine madah, kaul nembiak bela diberi perati nengah pengawa ngatur ASEAN Energy Youth Awards ti keterubah iya di Sarawak ke nerima 384 penyereta ari nembiak selampur ASEAN.
“Kelimpah Youth Pavilion ke meri awak ngagai nembiak ngulu macham aktiviti nyengkaum program 'fireside chat' begulai enggau ikon lumba menua Dato Pandelela Rinong, Community Market mega deka diatur dikena meri peluang komuniti dagang. Pavilion Sarawak deka mandangka transformasyen kuasa nengeri ari bepanggai enggau kereban api fosil ngagai kuasa ulih dikena baru," ku iya nerang.
Nangkan nya, pengerami bukai, iya nya pengerami ngintu taun ke-40 Tekat Batang Ai enggau penemuai deligit antarabansa ti ukai semina ngelai pemesai reti endur nya ke nyadi tekat hidro keterubah Sarawak, tang nyadi alai jelu mayas diau sereta palan eko-dagang temuai betikas antarabansa.
Program bukai baka Gala Dinner ke diatur Opis Menteri Utiliti enggau Telekomunikasyen Sarawak (MUT) bela diatur nyadi kelai kerejasama strategik kuasa di rantau tu.
Bela datai ba penemuai basa nya, Sapit Direktor UKAS, Mohamed Faizal Shah Ali, raban pegawai kanan UKAS sereta deligit SEB. –EDISI UKAS
