PUTRAJAYA: Perintah Besai udah besetuju mulai ke baru sebagi besai hak bekaul pelajar enggau pengerai Perintah Sabah enggau Sarawak.
Sapit Menteri Besai Dato Sri Fadillah Yusof madah, pekara ti disetuju bekaul isu pelajar nya nyengkaum pengawa Sabah enggau Sarawak ngatur projek pemansang pelajar, bekunsi penerang senentang pegawai kanan ke pindah sereta agih belanja ungkup program pemansang profesional.
Lalu bekaul isu pengerai, ku iya, sebagi besai ke dipinta dua buah nengeri nya mega udah disetuju, nyengkaum belanja ngatur enggau belanja pemansang ke ditambah, Direktor Pengerai Nengeri bulih autonomi ba sekeda pekara sereta pengawa negap pengereja pengawa ba Opis Pengerai Nengeri Sabah enggau Sarawak.
“Lalu pekara ke enda disetuju bekaul isu pelajar deka terus dirandau ba Komiti Atur Begulai Enggau Pemansang Pelajar Nengeri Sabah enggau Sarawak ari baruh Opis Menteri Pelajar Malaysia (KPM).
“Kelimpah ari nya, pekara pengerai ke dipinta ti enda disetuju deka terus dirandau ba Komiti Atur Begulai Enggau Pemansang Pengerai Nengeri Sabah enggau Sarawak ari baruh Opis Pengerai Malaysia,” ku iya madah ba siti penerang media, kena Hari Satu tu tadi.
Nambah ke jaku iya, iya madah, pekara ditagih bukai ke agi bedau abis diputar deka terus diperati Komiti Teknikal ari baruh Aum Kaunsil Pengatur Sempekat Malaysia 1963 (MTPMA63) enggau komiti kereja ari baruh opis menteri ke bekaul.
Nitihka penerang nya, pekara ke dipinta tu udah diputus sereta disetuju ba siti Aum Komiti Teknikal ari baruh Kaunsil Pengatur Sempekat Malaysia 1963 kali kedua ungkup taun 2025 ke diatur betuai ke Dato Sri Fadillah.
Nitih ku iya, aum tu besai reti dikena besedia nyikap Aum Kaunsil Pengatur Sempekat Malaysia 1963 (MTPMA63) Bil. 1 Taun 2025 tu betuaika Menteri Besai Dato Seri Anwar Ibrahim di Kuching, Sarawak kena 12 September deka datai.
Sama datai, Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof Dr Sim Kui Hian, raban Sapit Kepala Menteri Sabah Datuk Seri Panglima Dr Jeffrey G Kitingan enggau Datuk Ir Shahelmey Yahya, Menteri Beserakup Menua Dato Sri Aaron Ago Dagang, Menteri Pemansang Orang Dagang enggau Koperasi Datuk Ewon Benedick, raban Menteri Perintah Besai, Sabah enggau Sarawak, Sekretari Perintah Sarawak Datuk Amar Mohamad Abu Bakar Marzuki, Sapit Menteri sereta pegawai kanan ari perintah Besai, Sabah enggau Sarawak. -EDISI UKAS
