DARO: Pengeransing Perintah Sarawak dikemudi Gabungan Parti Sarawak (GPS) ba nyungkak pengelantang rayat menua pesisir nengah pelin sereta pejalai projek infrastruktur pemun ukai semina retorik politik.

Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol nyemetak madah, ari penyampau belanja pemansang Sarawak sepenyampau RM10.9 bilion ba taun 2025, RM6.8 bilion udah diagihka pemansang menua pesisir.

Maya nya, iya madah ke Perintah Sarawak diatu benung chakah ngaga 10 jematan besai ba kandang tebing tasik lalu semua ungkus manggai RM3.81 bilion, ke dipelanja Perintah Sarawak.

Ngenang jaku sekeda ke madah asil penatai pemisi perintah nadai meri pemaik ngagai rayat, iya madahka nya semina 'penemu ke enda panjai runding' bekaul Sarawak.

“Penau tuai Sarawak ukai semina nyungkak penatai pemisi perintah, tang mega diserumba enggau agenda pemansang infrastruktur ti deras, lebih agi ba menua pesisir,” ku iya madah maya ditanya ba telipun bekaul status pemansang menua pesisir di Sarawak, Hari Dua.

Datuk Abdullah sebedau nya nyuaka Belanja Projek Mit Menua Pesisir (MRP) sepenyampau RM831,000 ngagai 20 penerima dia, nyengkaum Komiti Pengelantang enggau Pengelikun Genturung Pendiau (JKKK), rumah panjai, komiti mesejit enggau surau, Gerempung Apai Indai enggau Pengajar (PIBG) sereta Tabika, Hari Dua.

Ari penyampau kesemua belanja nya, sepenyampau RM778,000 diagih ngagai 10 JKKK genturung dikena bejalaila projek mit baka nyeleti jalai genturung, nyeleti pendai enggau ngaga agu mensia mayuh lalu laluh belanja dikena ngatur aktiviti rayat enggau meli perengka rumah panjai.

Kaban Kunsil Nengeri (ADUN) Semop nya mega nyemetak madah guna atur belanja JKKK ke bejimat sereta nentuka tiap projek dipejalai nitih spesifikasyen baka ba peminta sida.

Iya madah, perintah mega udah nyendiaka bemacham inisiatif pengelantang nyengkaum pelajar pechuma enggau program Bantu Barang Diguna Sarawak (SKAS) beungkus RM450 juta ke diberi nengah Sarawak Pay. -EDISI UKAS