MIRI: Kaban Kunsil Nengeri (ADUN) Piasau ti mega Sapit Menteri Dagang Temuai, Industri Kreatif enggau Seni Pemerindang (Dagang Temuai), Datuk Sebastian Ting Chiew Yew, udah ngabas pejalai sekeda projek ari baruh Program Transformasyen Menua Pesisir (RTP) Piasau begulai enggau pegawai Opis Kereja Raya (JKR) enggau bala kontraktor, kena Hari Dua.

Siti ari projek diabas ngaul projek RTP 2023, projek Nangkir Stesyen Bas Beperabung SMK St. Columba, Miri beungkus RM100,000.

Projek tu mungkur pengawa nambah atap 52 meter pemanjai ungkup pengelantang nembiak nganti apai indai maya hari angat tauka ujan.

Projek udah tembu Julai tu tadi, sebulan tumu agi ari langgur asal.

Nangkan nya, iya ngabas projek RTP 2022, projek Balai Mayuhguna Kampung Senadin Jaya ke dipejalaika Komiti Pemansang enggau Pengelikun Genturung Pendiau (JKKK) ti beungkus RM100,000.

Sebedau tu, palan nya surau genturung lalu diatu diseleti nyadi nalan mayuh guna dikena rayat dia.

Kelimpah ari nya, iya mega ngabas projek RTP 2022 iya nya projek Ngelekat Lampu Jalai LED di Kampung Sealine Atas beungkus RM100,000.

Projek tembu bulan Mei 2025 nya nyengkaum pengawa ngaga tiga 'flood lights' enggau 15 unit lampu jalai LED dikena nambah tikas pengelikun sereta penampak ba kandang endur nya.

Datuk Sebastian Ting mega ngabas projek RTP 2024, Projek Ngaga Jalai 288 meter pemanjai di Kampung Sealine Atas ke beungkus RM200,000.

Projek ngaga jalai berengkah Jun tu tadi lalu disadang tembu ujung September tauka pun Oktober 2025.

Iya mega meri terima kasih ngagai semua ke bekaul ke udah nentuka pejalai projek RTP di sitak Piasau mujur.

Sama datai, Tuai Nembiak Parti Sa'ati Rayat Sarawak (SUPP) Piasau, Kaunsilor Leslie Lau.-EDISI UKAS