KUCHING: Tabung Ekonomi Gagasan Anak Sarawak (TEGAS) enggau kerejasama pitchIN, platform pendanaan ekuiti ramai (ECF) tebilang menua, deka ngatur TEGAS Fundraising Accelerator (TFA) edisyen keempat kena 8 ngagai 11 September 2025 di TEGAS Digital Village.

Chairman TEGAS ke mega Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh madah tuju program intensif empat hari berunggu nya dikena besikap nyadi pemungkal startup menua enggau penemu sereta strategi belanja.

Ku iya, penyereta bela diberi latih nyikap diri bekerejasama enggau pemeranak puku dikena nyungkak peluang ngulih belanja ngerembaika dagang.

“Juluk kami deka ngadaka rebak orang dagang besai empas Sarawak.”

“Enggau iring pakar sereta akses terus ngagai rentayan pemeranak puku, kami andal startup menua ulih mansang sereta ngerembus makit global.

“Tu masuk taun keempat ngatur program nya, TFA dikeandal nyadi penyungkak ba nyikap strategi melanja kelimpah muka rentayan begulai enggau pemeranak puku enggau pemekuh industri,” ku iya madah ba penerang media sehari tu.

Nambah ke jaku iya, iya madah, program nya bela meri penemu silik bekaul proses melanja, nyengkaum pengawa nyendia ‘pitch deck’ ti efektif sereta atur kaul enggau pemeranak.-EDISI UKAS