BINTULU: Projek nyeleti Sekula Sekondari Vokasional Bintulu tembu tumu agi ari langgur.
Projek beungkus RM21.5 juta nya dipejalaika Tim Projek Khas 2 (PPK2), Opis Kereja Raya (JKR) Malaysia ngena chara konvensional penyanding penemu nengah kontraktor Asarajaya Sdn. Bhd.
Pengawa nyua projek tembu nya ngagai Kolej Vokasional Bintulu, Sarawak udah dipenyadi Menteri Kereja Raya, Dato Sri Alexander Nanta Linggi, kena Hari Satu tu tadi.
Nitih ku Dato Sri Alexander, projek nya 49 hari tumu agi ari langgur asal lalu enda begunaka Extension of Time (EOT), ti tau nyadi chunto manah dikena bejalai ke projek bukai.
Ku iya, projek nyeleti tu sebagi ari inisiatif besai Perintah MADANI dikena ngenegap ekosistem Pelajar enggau Latih Teknikal sereta Vokasional (TVET), seriris enggau aspirasyen menua ke deka ngadaka modal mensia bepengelandik tinggi sereta ulih besemekih.
“Beberapa woksyop baru udah digaga, nyengkaum Woksyop Seni Kulinari, Fesyen, Kosmetologi, Elektrik, Elektronik, CAD, Mock Office, ‘Wiring’ enggau Teknologi ‘welding’.
"Kesemua tu deka nyadi palan latih pemadu manah dikena nempa pengereja landik,” ku iya.
Iya madah pemujur nembuka projek tu ukai semina dikena alai belajar tang dikearap ulih nyungkak semangat baru ba raban pengajar enggau nembiak ngambi majak nempa penyulut.
Ba jaku iya, iya bela meri terima kasih ngagai semua ke bekaul, kelebih agi JKR Malaysia, tim projek, kontraktor besai sereta bala penyanding penemu profesional ti mandangka pengeransing gawa.
Maya ti sama, iya ngingatka kontraktor ngambi ngerumban pengawa ngadu enti sema bisi sebana sepemanjai Tempoh Tanggungan Kecacatan (DLP), lalu JKR dipinta majak matau pengudah tu dikena nentuka perengka guna ba tikas manah sereta nitih spesifikasyen.
“KKR enggau JKR semampai ransing bejalaika projek besai empas meri pemaik ngagai rayat. Pemujur projek tu kelai aspirasyen Perintah MADANI ngasilka projek ti bisi kualiti, tembu ba maya ti patut lalu meri nilai tambah ngagai rayat,” ku iya madah baru.
Bela datai ba program nyua nya, Sapit Menteri Infrastruktur enggau Pemansang Penyangkai Kapal, Dato Majang Renggi, Sekretari Bagi Pemansang KPM, Datuk Masyati Abang Ibrahim sereta sekeda pegawai kanan JKR enggau Residen Bagi Menua Bintulu, Datu Nyurak Keti.-EDISI UKAS
