KUCHING: Pengawa nyalin ukai semina chara komunikasyen, tang nyadi penyungkak strategik ba pemansang penemu, ekonomi digital, industri kreatif sereta diplomasi ngilah budaya negeri tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, salin beguna nyadi jematan penyambung mensia, ngerembai akses penemu sereta nyaga pesaka budaya pupu bansa.
Ku iya, di Sarawak bisi lebih 30 raban etnik ti ngembuan jaku bebida, pengawa nyalin nyadi mekanisme nyaga pesaka linguistik enggau budaya ti nyelai ba nengeri tu.
“Ba penemu aku, salin tu semina perengka komunikasyen, tang iya nyungkak strategik pelin pemansang Sarawak ke deka ngemuntangka kerejasama begulai enggau pemeranak puku ari menua bukai sereta nambah akses modul engau latih ti bisi kualiti,” ku iya.
Iya madah munyi nya baka teks jaku ke dibacha Sapit Menteri Pemansang Pengelantang Komuniti Sarawak, Datuk Mohammad Razi Sitam serimbai Konferens Salin Antarabansa Ke-20 ke diatur ditu, Hari Dua.
Datuk Patinggi Abang Zohari bela nyemetak madah pengawa meranak puku ba bidang salin, latih penyalin profesional, enggau teknologi linguistik sebagi ari infrastruktur intelektual ke nyukung aspirasyen Sarawak ba renggat nasional sereta antarabangsa.
Ba jaku iya, Premier mega nyebut pemesai reti kaul salin enggau pemansang sektor penerebai serantau, nyengkaum servis AirBorneo ke deka nyambung Sarawak enggau Singapura, Kuala Lumpur, Jakarta sereta Hong Kong berenggat.
Nitih ku iya, salin ti bisi kualiti deka nyadi kunchi ngagai diplomasi budaya ba raban nepan bilun ke macham jaku dikena.
Berebak enggau nya, Datuk Patinggi Abang Zohari muji Universiti Malaysia Sarawak (UNIMAS), kelebih agi Fakulti Pelajar, Jaku enggau Komunikasyen ke nyadi tuai rumah, sereta kaban pengatur, Gerempung Penyalin Malaysia (PPM), Dewan Bahasa dan Pustaka (DBP) sereta Palan Salin enggau Bup Malaysia (ITBM) ke pemujur sida ngatur konferens betikas tinggi tu.
“Konferens tu nyadi palan alai bekunsi penemu enggau inovasyen ba bidang salin.
"Aku ngarap konferens tu ulih ngadaka mayuh agi penyalin profesional, lebih agi ari Sarawak, ngagai renggat global,” ku iya.
Konferens dua taun sekali tu ngempuru raban bepengelandik, penyalin profesional, pemansik enggau penyereta ari macham menua.-EDISI UKAS
