SEBUYAU: Program Project of Dream Realized (Pro-DR) Ke-10 ti diatur Tabung Ekonomi Gagasan Anak Sarawak (TEGAS) enggau sukung Opis Pelajar Nengeri Sarawak (JPNS) meri peluang pelajar, latih enggau pengawa puang ngagai nembiak ba menua pesisir.

Program nya udah dipenyadika Menteri Utiliti enggau Telekomunikasyen Sarawak ti mega Kaban Kunsil Nengeri (ADUN) Sebuyau, Dato Sri Julaihi Narawi ditu, kena Hari Satu tu tadi.

Lebuh bejaku, iya nyemetak madah inovasyen digital diatu beguna endar ukai semina ungkup rayat ba mengeri aja tang mega menua pesisir nengah teknologi baka kuasa solar enggau Internet of Things (IoT) ulih nyaup sektor betanam betupi sereta pengawa berikan ngasilka produk bisi kualiti enggau pengawa lantang agi.

Dato Sri Julaihi nerang, perintah nengeri betuai ke Premier Sarawak ransing negap kuasa ulih dikena baru enggau juluk ngasilka kapasiti kuasa 10,000 megawatt manggai 2030, ke alai 60 peratus ari kuasa nya datai ari kuasa solar.

Iya madah, inisiatif nya nipakka pengeran negap modal mensia nengah transformasyen pelajar, TVET enggau STEM, dikena nempa rebak landik digital ke ulih meri pulai ngagai aspirasyen Sarawak ke deka nyadi nengeri mansang manggai taun 2030.

Roadshow Pro-DR 2025 deka diatur 29 hari berunggu ti disereta 45 raban ari palan pelajar enggau latih di selampur Sarawak.

Kelimpah pemandang pelajar enggau kereja, program tu bisi sesyen bekunsi industri, kuiz interaktif, treasure hunt, panggau karaoke, sereta penerang bekaul sekulaship enggau pengawa puang ba pengawa ekonomi digital.

Program bejadi mega richah enggau pengawa nyua perais, begambar sereta ngelawa palan pemandang.

Sama datai Tuai Pegawai Eksekutif TEGAS, Udin Bujang, Sapit Residen Bagi Menua Samarahan, Rais Ahmat, sereta Pegawai Pelilih Sebuyau, Ayuradiman Bujang.-EDISI UKAS