BINTANGOR: Projek jalai baru ke digaga nengah Program Transformasyen Menua Pesisir (RTP) di Rumah Panjai Landing, Sungai Gemuan ditu nyadi jalai alternatif peranak menua dikena mutar penanggul jalai lama ke suah ampuh ketegal ai pasang raya enggau ujan bangat.

Kaban Kunsil Nengeri (ADUN) Meradong, Datuk Ding Kuong Hiing madah, projek beungkus RM50,000 nya udah dikemendarka Perintah Sarawak. Projek nya nyengkaum pengawa nyemin jalai 190 meter pemanjai ti nyambung Rumah Panjai Landing enggau Rumah Jawi, Sungai Gemuan.

“Lebuh jalai tembu ila, tu ukai semina ngemuntang peranak mindah aja, tang mega nyadi jalai baru ti likun sereta lantang agi enti dibanding jalai lama ti suah ampuh maya hujan bangat tauka ai pasang,” ku iya madah maya ngemataka Program Nyua Taba Projek RTP DUN Meradong di Rumah Panjai Landing, kena Hari Satu tu tadi.

Taja pia, iya nyemetak madah, agensi pengatur baka Opis Entali Ai enggau Parit (DID) Bagi Menua Sarikei patut nentuka kontraktor ke dichiri nengah undi nitih proses sereta spesifikasyen kereja ke udah ditetapka.

Datuk Ding bela muji perambu projek ti udah disikap enggau spesifikasyen ba dokumen pemendar lalu madah projek nya patut ditembuka dalam kandang tiga bulan berengkah ngaga, iya nya ari 18 Ogos ngagai 19 November 2025.

Ku iya baru, pejalai projek RTP sebagi ari inisiatif perintah nengeri ke deka nyungkak infrastruktur menua pesisir, lalu meri pemaik ngagai peranak Rumah Panjai Landing enggau Rumah Jawi.-EDISI UKAS