SARIKEI: Perintah Sarawak meransang semua rayat menua tu lebih agi peranak Sarikei enggau ke semak ngambi sama sampal datai ngerichahka pengerami ngintu Hari Kebangsaan 2025 Renggat Sarawak ti deka diatur kena 30 enggau 31 Ogos tu.

Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah ti nyadi Menteri pengatur pengerami taun tu madah, rayat diperansang nuatka Jalur Gemilang ba rumah, premis enggau perengka pengangkut diri nyadi kelai penaluk ke Malaysia.

“Pengerami Ngintu Hari Kebangsaan ukai semina program ninting taun, tang nyadi kelai semangat rebak dulu ke berambun nyawa ti patut dikenang tetiap rayat.

“Rambai Jaku 'Malaysia Madani: Rakyat Disantuni' ngingatka kitai senentang reti merdeka ke bendar, iya nya rayat majak dijaga, dibasa sereta dibantu ba semua pekara pengidup," ku iya madah maya aum media khas ditu, kena Hari Satu tu tadi.

Iya nyemetak madah, pengerami nya ukai semina ulih nerenak semangat patriotik aja, tang mega nambahka pengeleda bekaul pemesai reti beserakup, bebasa sereta kerejasama entara bansa di Sarawak.

Nitih ku iya, rambai jaku pengerami sekali tu setipak enggau aspirasyen 'Sarawak Maju Makmur' ti ngemerat pengelantang rayat, pemansang inklusif sereta masa pupu budaya enggau pengidup mensia.

Batang program ke dilanggur diatur, nyengkaum Malam Merdeka ba 30 Ogos di Sarikei Integrated Sports Complex, Kampung Seberang ditu, Unity Walk di Kompleks Lumba Sarikei, sereta Pengawa Begempuru Hari Kebangsaan di Dewan Suarah Sarikei kena pagi 31 Ogos.

Dato Sri Fatimah andal, pengerami ngintu Hari Kebangsaan di Sarikei sekali tu deka mai semangat segulai ti rat agi, lalu ngenegap identiti rayat Sarawak ti lantang sereta ulih besemekih.

Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini Toh Puan Datuk Patinggi Fauziah Mohd Sanusi sereta Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg disadang ngulu pengerami nya.

Bela datai ba aum media, Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Sapit Menteri Perambu Mengeri, Pengatur Tanah enggau Rampa Menua Sarawak Datuk Len Talif Salleh, Sapit Menteri Pengangkut Sarawak (Langit enggau Jalai) Datuk Dr Jerip Susil, Residen Sitak Sarikei Datu Michael Ronnie Langgong sereta temuai dipebasa ke bukai. -EDISI UKAS