MIRI: Opis Menteri Kereja Raya (KKR) meri jamin projek Jalai Alun Besai Pan Borneo Sarawak (LPB) deka ditembuka nitih langgur sereta spesifikasyen, dikena ngerumban pemaik ari projek nya ulih diasai rayat.

Menteri ba opis menteri nya, Dato Sri Alexander Nanta Linggi madah, ba Pakej WPC 11, bisi dua iti agi batang pengawa, iya nya pengawa ngaga Viaduct Bukit Song 300 meter pemanjai enggau pengawa nyeleti jalai 4.2 kilometer pemanjai ke semina ulih berengkah digaga pengudah pengawa nukar paip ai ari LAKU Management tembu.

“Viaduct Bukit Song diatu udah 98 peratus digaga lalu disadang tembu Oktober 2025.

“Viaduct diputus digaga laban gaya tanah di Bukit Song enda engkeman ditambun, lalu nya sebagi ari chara mutar timpuh panjai ti engkeman sereta likun,” ku iya.

Taja pia ku iya nerang, semua pakej enda ulih tembu taun tu baka ke dilanggur bepun ari pengawa nukar paip ai LAKU meseti dulu agi digaga sebedau pengawa nyeleti jalai 4.2 km berengkah.

Ketegal nya, JKR Sarawak begulai enggau kontraktor udah ngelangkar pelin baru, nyengkaum mutar penanggul bekal ai di Miri, nentuka pengelikun sereta projek digaga nitih spesifikasyen kelimpah pengawa nukar paip baru enggau nyeleti jalai berenggat berengkah suku kedua 2026 dalam kandang 24 bulan.

Dato Sri Alexander nyemetak madah KKR nengah JKR Sarawak deka terus nentuka sida ke bekaul enggau kontraktor bekerejasama, kelimpah deka matau projek enggau chara berenggat ngambi projek mujur digaga.-EDISI UKAS