KUCHING: Kuching dipilih nyadi tuai rumah ngatur International Council on Archives (ICA) Conference 2027, siti basa besai ngagai Malaysia, lebih agi Sarawak ba pengawa ngatur arkib enggau pesaka digital.
Pengawa milih Kuching nyadi tuai rumah nya dipadahka ICA ke bepalan di Paris kena 28 Mei tu tadi, ngalahka Bogota, Colombia enggau Johannesburg, Afrika Selatan.
Tuai Direktor Arkib Menua Malaysia, Dato’ Jaafar Sidek madah, tu siti basa sereta kelai pengulih Malaysia ngatur konferens betikas dunya.
“Kitai kala nyadi tuai rumah ba taun 2008 ke digulu lebih 1,000 penyereta ari 109 buah menua. Ke sekali tu, kitai ngembuan juluk ati matak penatai penyereta ngelui 1,000 iku, taja pan pemadu mimit ditetapka ICA semina naka 700 ngagai 800 aja,” ku iya nerang.
Iya madah munyi nya pengudah ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi, Petra Jaya, Hari Satu.
Rambai jaku konferens nya “Preserving Cultural Heritage in the Digital Age” berati pengawa ngatur rikod elektronik enggau bekenaka digitalisasyen nyadi chara pemadu manah nyimpan sereta nabur penerang global.
Kelimpah ari nya, Tuai Pegawai Eksekutif Pustaka Negeri Sarawak, Japri Bujang Masli madah, Sarawak benung ngaga begunan arkib nengeri baru ke disadang tembu tengan taun 2026.
Begunan nya deka disikap enggau teknologi moden nyengkaum Archival Storage and Retrieval System (ASRS) bepelasarka robotik dikena nyimpan sereta ngulih kereban arkib.
“Nengah teknologi moden tu, kitai ukai semina ulih nyaga dokumen perintah enggau pesaka menua, tang mega bekunsi pengelandik enggau komuniti arkivis antarabansa,” ku iya nerang.
Konferens nya dipelaba deka digulu arkivis, pakar penerang, pemansik, sereta penengkebang polisi ari selampur dunya berandauka inovasyen, pemar enggau bidang arkib maya jeman digital dudi hari.
Bela datai ba penemuai basa nya, Tuai Pegawai Eksekutif Business Events Sarawak, Amelia Roziman, Sapit Tuai Direktor Arkib Menua Malaysia, Zaidin Mohd Noor, sereta ke bukai.-EDISI UKAS
