SARIKEI: Servis ngagai rayat seruran nyadi batang pekara dikemerat Sapit Menteri Pengereja Asal enggau Pemeruan Rampa Menua, Dato Sri Huang Tiong Sii.

Ku iya, sepemanjai semilan taun iya nyadi pengari rayat, sukung tegut ari rayat pupu bansa nyengkaum kaban Gerempung Klan Chen, nyadi pengering enggau pengandal nyungkak pemansang di Sarikei enggau Meradong.

Iya madah munyi nya maya bejadika Pengerami Numbuh Gerempung Klan Chen Sarikei Sarawak Ke-30 di SMK St Anthony Sarikei ditu, apin lama tu tadi.

Sebagi ari projek besai ti mujur digaga iya nya pengawa ngaga jalai alun enggau Jematan Batang Rajang ke diatu nyambung Sarikei enggau Tanjung Manis.

“Tu asil saup rayat ngagai Perintah Sarawak ke dipegai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ke udah mai pengentap politik enggau ekonomi sereta mai pemansang mayuh agi ngagai sitak kitai, "ku iya.

Maya pengerami nya, Dato’ Sri Huang ke mega Kaban Parlimen Sarikei sereta Kaban Kunsil Nengeri (ADUN) Repok muji Gerempung Klan Chen ke pemujur sida iya meruan beserakup dalam timpuh 30 tahun udah.

Nyadi kelai sukung, iya meri belanja sepenyampau RM50,000 ngagai Gerempung Klan Chen Sarikei dikena ngatur aktiviti ninting taun sida.

Sama datai, ADUN Meradong Datuk Ding Kuong Hiing, Datuk Wira Ding Huong Mieng, Chairman Pengatur Ting Ing Hui, Chairman Gerempung Klan Chen Sarikei Sarawak Ting Sing Teck enggau Chairman Gerempung Klan Chen Sarawak Ting Kuong Hii. -EDISI UKAS