TANJUNG MANIS: Safari Nginti Tanjung Manis deka dipasuk ba kalendar dagang temuai Sarawak bepun ari nerima timbal ke chukup manah ari mensia mayuh.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nginti majak matak penatai temuai menua bukai ke dipeda nyaup nyungkak sektor dagang temuai Sarawak nyema program nya dipasuk ba kalendar dagang temuai.

“Baru tadi, Menijar Besai Kaunsil Pemansang Industri Kayu Ramu Sarawak (PUSAKA) Zainal Abidin Abdullah minta, ngambika Safari Nginti Tanjung Manis dipasuk ba kalendar dagang temuai Sarawak.

“Aku minta Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah masukka program tu ba kalendar dagang temuai,” ku iya.

Iya madah munyi nya maya bejaku ba Pengerami Nutup Safari Nginti Tanjung Manis, ditu, kena Hari Minggu tu tadi.

Datuk Patinggi Abang Zohari madah, ambika banding baka di Telaga Air, Kuching, orang ari menua Singapura sanggup datai ke Sarawak semina ketegal deka nginti.

“Tu nyadi siti industri ari dagang temuai ke bisi bekaul enggau aktiviti nginti,” ku iya madah baru.

Sama datai, Sapit Menteri Perambu Mengeri, Pengatur Tanah enggau Rampa Menua Sarawak Datuk Len Talif Salleh, Sapit Menteri Ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Kaban Parlimen Tanjung Manis Ir Yusuf Abdul Wahab, Menijar Besai Kaunsil Pemansang Industri Kayu Ramu Sarawak (PUSAKA) Zainal Abidin Abdullah, Residen Sitak Mukah Datu Kueh Lei Poh serta pemesai dipebasa ke bukai. -EDISI UKAS