TANJUNG MANIS: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Tanjung Manis deka ngasaika pemansang renggat kedua sepengudah menua nya berengkah dikemansang 40 taun ke udah.
Ku iya, perintah sarawak ngaduka padang bilun kelimpah ngemanahka agi jalai alun nyengkaum jematan.
“Maya aku nyadi Menteri Industri 40 taun suba, aku kala diasuh niang Tun Taib mungkal Tanjung Manis lalu diatu, aku ngepunka pemansang renggat kedua ditu ngambi pemansang kandang menua Kuala Rajang enggau Tanjung Manis, nyengkaum selampur menua Delta diperati.
"Sektor Pemakai enggau Sektor Dagang Temuai deka diperati lebih agi. Nya alai padang bilun kitai patut ditangkir besai agi ngambi bilun besai ulih terengkah ditu,” ku iya.
Iya madah munyi nya maya bejaku ba Pengerami Nutup Safari Nginti Tanjung Manis, ditu, kena Hari Minggu tu tadi.
Iya madah, penatai temuai menua bukai ngagai Tanjung Manis deka nyaup nambahka penatai pemisi peranak menua nya lebih agi ke bisi ngaga industri home stay enggau pemakai tasik.
“Kitai ulih mai temuai ari Korea enggau Jepun, alai kitai nemu pemakai sida baka pemakai kitai. Pemakai sida ’sashimi’ lalu kitai ditu bisi umai, nyadi kitai ulih nyendiaka umai ngagai sida. Maya sida iya bebeli barang, penatai pemisi peranak menua ditu deka betambah laban enti kitai semina ngarap rayat ditu aja tu nyangka enda chukup laban penyampau tubuh kitai mimit,” ku iya madah baru.
Kelimpah tebilang enggau pemakai tasik sereta dagang temuai, Tanjung Manis diatu bela dikemansangka enggau pengawa bumai lalu enda lama agi bela deka nerima belanja besai ari Opis Nanas Malaysia dikena nanam nanas.
Sama datai, Sapit Menteri Perambu Mengeri, Pengatur Tanah enggau Rampa Menua Sarawak Datuk Len Talif Salleh, Sapit Menteri Ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Kaban Parlimen Tanjung Manis Ir Yusuf Abdul Wahab, Menijar Besai Kaunsil Pemansang Industri Kayu Ramu Sarawak (PUSAKA) Zainal Abidin Abdullah, Residen Sitak Mukah Datu Kueh Lei Poh serta pemesai dipebasa ke bukai. -EDISI UKAS
