TANJUNG MANIS: Sarawak entap penemu nyaga sereta ngintu pengelikun kandang tasik lebih agi bekaul pengawa berikan nadai pemendar ari menua sepiak.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ketegal nya, Sarawak mayuh meranakka puku ba Sarawak Coastguard kelimpah bisi nanam tukun gaga.

Ku iya, Perintah Sarawak mansutka belanja RM70 Juta dikena nanam tukun gaga ti ukai semina nyaup pengelikun ekosistem tasik tang bela tau nyaup nyeliah pengawa berikan nadai pemendar.

“Enti kitai nadai tukun gaga tu, ’troller’ ari menua bukai sepeneka ngulih ikan ba tasik kitai laban kitai kaya enggau ikan, nyentuk orang berikan ari menua bukai datai enchuri ikan kitai ditu.

“Sida tu mayuh datai ari menua Vietnam enggau Thailand, nyadi kitai nanam tukun gaga tu ngambika ’troller’ sida enda ulih nangkap ikan laban tukun tu deka nyarikka pukat sida tauka pukat sida iya deka putus laban tukun gaga nya berat," ku iya.

Iya nerangka pekara nya maya Pengerami Nutup Safari Nginti Tanjung Manis, ditu, kena Hari Minggu tu tadi.

Kelimpah ari nya, iya mega madah, perintah Sarawak merambu deka nambah dua buah agi kapal Sarawak Coastguard dikena ngenegapka agi pengelikun kandang tasik Sarawak.

“Dua buah kapal 50 meter pemanjai deka ditambah agi dikena kitai sama nyaga reta kitai, nyengkaum ikan," ku iya madah baru.

Sama datai, Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh, Sapit Menteri Ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Kaban Parlimen Tanjung Manis Ir Yusuf Abdul Wahab, Menijar Besai Kaunsil Pemansang Industri Kayu Ramu Sarawak (PUSAKA) Zainal Abidin Abdullah, Residen Sitak Mukah Datu Kueh Lei Poh sereta pemesai dipebasa ke bukai. -EDISI UKAS