LUNDU: Unit Komunikasi Awam Sarawak (UKAS) ngatur singkang proaktif ngenataika penerang ngagai mensia mayuh ngambika nemu bekaul pengawa nyaga penyu ba tasik nengeri tu.

Direktor UKAS, Awang Putrayusrie Awang Redzuan madah, program tanggungpengwawa rama korporat (CSR) Sea Turtle Conservation Project ke diatur ba Taman Negara Tanjung Datu enggau Pulau Talang-Talang besai reti dikena ngepun pengawa ngenataika penerang bekaul nyaga rampa menua ngagai rayat mayuh.

"Tu sebagai ari penerang ti beguna ke patut dikenataika ngagai mensia mayuh bekaul pengeransing Opis Pengatur Penyu, Sarawak Forestry Corporation (SFC), Opis Kampung Sarawak enggau agensi ke ngatur Taman Negara kitai di Sarawak.

"Program CSR tu meri peneleba ti beguna ngagai kitai raban media ba pengawa ngenataika penerang ngagai rayat ngambi bela ngintu pemanah rampa menua Sarawak,” ku iya.

Iya madah munyi nya ba hari kedua program CSR Projek Sea Turtle Conservation di Pulau Talang-Talang Besar ditu, kena Hari Minggu tu tadi.

Bela datai, Pegawai Eksekutif Kaunsil Pengatur Penyu, Abdul Aziz, Pegawai Nyaga Jelu Siga ke mega Park Warden Taman Negara Tanjung Datu enggau Pulau Talang-Talang, Mohamad Dzulkhairi Eneng sereta Direktor Borneo Glamping, Awang Saifeluddin.

Nambah ke jaku iya, Awang Putrayusrie madah, peneleba dua hari semalam ba palan nya meri penemu baru ngagai raban UKAS ngemata chara nyaga penyu nyengkaum proses telu mechah.

"Kitai udah ngemata kediri, bakani sida nyaga penyu, nyengkaum proses telu mechah.”

"Peneleba tu deka dikunsi enggau mensia mayuh nengah platform sereta produk UKAS, lebih agi bekaul program ke digaga opis ke bekaul,”ku iya.

Program CSR nya berengkah Hari Enam tu tadi di Taman Negara Tanjung Datu meri awak ngagai bala penyereta ngemataka proses telu penyu mechah sereta ke bukai.

Penyereta bela dibai berati pemanah rampa menua di Pasir Antu Laut sebedau besaup meresi tebing tasik di Telok Labuhan Gadung ke mega dikumbai Pantai Penyu.-EDISI UKAS