SRI AMAN: Ekspo Pelajar Sarawak 2025 Renggat Opis Pelajar Pelilih (PPD) Sri Aman mujur ngempuru urung 500 nembiak ari lima sekula sekondari ba Simanggang begulai enggau apai indai sida.

Sapit Menteri Pelajar, Inovasyen enggau Pemansang Penau Sarawak ti mega Kaban Kunsil Nengeri (ADUN) Simanggang, Datuk Francis Harden Hollis udah bejadi program nya ditu, kena Hari Enam.

Lebuh bejaku, iya ngelalau nembiak enggau apai indai enda masau peluang ngulihka penerang terus ari institusyen pelajar tinggi (IPT) ti ngulu pemandang kelebih agi bekaul peluang nampung pelajar enggau bantu belanja.

“Perintah Sarawak keran mantu anak Sarawak ba pekara pelajar nengah sukung belanja Yayasan Sarawak.

“Terima kasih mega ngagai PPD Sri Aman laban nyadi pengatur program ti meri pemaik besai ngagai komuniti ditu,” ku iya.

Entara IPT ti ngambi bagi nyengkaum Yayasan Sarawak, Palan Penyulut Teknologi Sarawak (CENTEXS), Kolej Universiti i-CATS, Universiti Teknologi Swinburne, Universiti Teknologi Sarawak (UTS), Sarawak Skills enggau Kolej Laila Taib (KLT) Sibu.

Ba pengawa nya, bisi 50 nembiak nyulut 2024 nerima insentif Yayasan Sarawak, ngaul 29 nembiak Sijil Pelajaran Malaysia (SPM) enggau 21 nembiak Sijil Tinggi Persekolahan Malaysia (STPM).

Kelimpah ari nya, Yayasan Sarawak mega nyuaka chek penyampau RM285,800 ungkup Bantu Uniform Sekula ngagai 40 sekula sereta RM60,800 ngagai 78 nembiak nengah PPD Sri Aman.-EDISI UKAS

#UKASnews
#SaluranInformasiRakyat
#SarawakMajuMakmur