TANJUNG MANIS: Model jali tanah ungkup projek bumai padi udah mujur ba Kuala Rajang ti nentuka pedagang enggau pengempu tanah bela untung.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tanah peranak ba sitak nya udah dikemansang raban kompeni nengah siti rentayan kerejasama entara kededua raban enggau raban kompeni meranak puku ungkup ngena tanah nya endur bumai padi.

“Kebuah pia laban (tanah) enda dikena enggau dikemansang peranak dia ketegal besai ungkus, nya kebuah nengah pemisi raban kompeni nyaup nampung pengawa bumai padi chara moden ngena kereban moden dikena nyungkak ekonomi 'subscale'.

“Tu mega nentuka pengempu tanah pen bulih jereki ari penyuwa tauka pajak entara pengempu tanah enggau raban kompeni.

“Tu siti model ti udah mujur ditu ti mai reti ‘win-win’ tauka bela untung ke alai raban pedagang enggau pengempu tanah bulih penatai pemisi,” ku iya.

Iya madah munyi nya ba aum pemberita pengudah ngabas Tibang Padi Tanjung Manis di Umai Padi Ta Ann Padihead kena Hari Minggu.

Nambah ke nya, Datuk Patinggi Abang Zohari madah, Padihead Sdn Bhd begulai enggau bakih sida ti betuai ke Dato K.H. Wong udah mujur ngasilka empat tan padi pengelama dua musim dalam setaun enggau lebih 865 ekar tanah dikemansang.

Ku iya, pengulih pengawa betanam padi di Kuala Rajang ulih manggai 10,000 hektar nyengkaum sitak Daro nyentuk Pulau Bruit.

“Kitai ba Sarawak enti ulih nanam 14,000 hektar selampur sarawak ulih mansutka beras urung 240,000 tan metrik ti chukup dikena.

“Enti kitai nambah baru 14,000 hektar, nya deka nyadi dua kali lipat nyentuk 480,000 tan metrik ti deka dikemansang kitai ba taun 2030.

“Engka kitai uliih eksport beras bukai kelimpah ari dikena kitai empu,” terang iya.

Sama datai, Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh, Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol, Sekretari Mendam Opis Menteri Industri Pemakai, Komoditi enggau Pemansang Kandang Menua Sarawak, Datu Sirai Daha sereta temuai dipebasa bukai. -EDISI UKAS