BINTULU: Pengawa nyaga pemeresi sungai beguna endar kelebih agi dikena nyaga pengerai mensia mayuh di Bintulu berindik ari kes denggi ti majak nambah dia, empai lama.

Sapit Menteri Pengangkut Sarawak (Sungai enggau Tasik), Dato Henry Harry Jinep madah ke sungai ti alit enggau tebing mayuh uras ulih nyadi kebuah nyamuk Aedes betelu kelebih agi kes denggi di Kampung Baru, Kampung Sinong enggau Pasar Lama nambah.

“Sungai nya kedap pengidup. Enti kitai nyaga sungai, sungai deka nyaga kitai meri ai beresi, pemakai, jereki, rekreasyen enggau pengerai tang enti kitai enda nyaga manah, sungai deka nyadi pun penanggul enggau penusah,” ku iya lebuh bejadi Pengawa Nutup Program Meri Pengeleda Pemeresi Sungai“Friends of Rivers” di Terminal Penumpang Bintulu kena Hari Lima.

Program diatur Kaunsil Sungai Sarawak (LSS) nya ukai semina licha tang mega ngaul aktiviti beripai, pelajar komuniti sereta kerejasama bemacham raban.

Dato Henry mega ngelalau raban Friends of Rivers dikerembai ngagai selampur Sarawak lalu nyadi budaya begulai ke alai komuniti ngasai ke sungai nya nyadi sebagi ari kandang rumah sida.

Ba pengawa sama, penyereta mega diberi penerang ari Syarikat Beststone Quarry Sdn. Bhd. Bekaul projek ngerawang enggau mindahka batu mit ari Nanga Batang Kemena dikena ngelanchar jalai kapal enggau bot.

Sama datai, Kaban Kunsil Nengeri (ADUN) Jepak, Iskandar Turkee, Controller LSS, Lt. Kol (Bersara) Ding Tiew Wong, Pegawai Pelilih Bintulu, Awang Mohammed Nizam Awang Ali Bohan sereta Sekretari Politik Premier Sarawak, Angellie Stephen Raja. -EDISI UKAS