PAKAN: Bisi 99 iku chairman enggau sekretari Komiti Pemansang enggau Pengelikun Genturung Pendiau (JKKK) udah dichiri di Pelilih Pakan nengah pengawa nyua surat chiri ke deka diberi berenggat.

Program nyua surat chiri ngagai 30 Chairman enggau Sekretari JKKK Pelilih Pakan udah dipenyadi Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) ke mega Kaban Kunsil Nengeri (ADUN) Pakan, Tan Sri Dato Sri William Mawan Ikom, di Opis Pelilih Pakan, kena Hari Empat tu tadi.

Lebuh bejaku ba mua mayuh, iya mekat sida ke dichiri ulih ngesan tanggungpengawa enggau manah sereta nitih atur sereta undang-undang ke udah ditetapka.

“Anang ngumbai tanggungpengawa tu peluang ka mandangka pangkat tauka salah guna kuasa.

“Pekera ke diguna ungkup rayat patut dikemerat lalu putar jampat enti bisi pekara tauka sebana dikenataika ngagai sida ke bekaul,” ku iya madah.

Kelimpah ari nya, iya bela ngelalau JKKK meruan proaktif nyaup agensi perintah ngatur sereta bejalaika projek pemansang ungkup pengelantang peranak menua ditu.

Urung 80 iku datai ngulu program nya ke bela digulu Pegawai Pelilih Pakan, Mohd Irwan Abdullah @ William Manggoi, raban tuai bansa enggau genturung sereta bala ke nerima surat chiri.-EDISI UKAS