KUCHING: Liga Premier Sarawak diatur Serakup Main Bol Sarawak (FAS) disadang berengkah ujung bulan September tu.
 
Presiden FAS Dato Fazzrudin Abdul Rahman madah, raban sida udah nesau semua tim ti deka bemain ba tetiap serakup bagi menua ngambi sedia nganjung tim.
 
Iya madah, FAS diatu ngatur silik taga main nyengkaum kelang ti deka diatur nengah kerejasama enggau Kaunsil Lumba Sarawak (SSC).
 
“Kitai udah berandau enggau SSC lalu diatu sida benung ngatur silik kelang pekit, nya kebuah kitai apin ulih meri pemutus haribulan kebendar pekit nya diatur tang tetap ba ujung bulan September," terang iya.
 
Iya nerang pekara nya lebuh dirandau pemberita pengudah Pengawa Nyua Saup Belanja RM1 juta Ari Press Metal Bintulu Sdn Bhd Ngagai KCFC ba siti hotel tebilang ditu kena Hari Dua.
 
Iya madah baru, kelang tebal agi diatur ba stadium main bol ba tetiap bagi menua dipegai SSC, tang bisi mega deka diatur ba padang bol diempu Kaunsil Pelilih.
 
Kelimpah ari nya, iya ti mega Tuai Sekretari Politik Premier Sarawak madah, bisi 13 tim deka bepadan ba liga sekali tu ti diatur Serakup Main Bol Bagi Menua enggau pekit deka dibagi ngagai dua raban iya nya utara enggau selatan.
 
Iya nerang, nya siti ari pengawa ngidupka baru serakup main bol bagi menua enggau ngemudi pemansang main bol ba menua diri empu sebedau dibuka ngagai kelab main bol ti bisi ba Sarawak. -EDISI UKAS