KUCHING: Kompeni Press Metal Bintulu Sdn Bhd terus meri sukung tegut ngagai Kuching City FC (KCFC) enggau meri belanja penyampau RM1 dikena nurun bepekit ba Liga Super Malaysia 25/25.
 
Chairman KCFC, Dato Fazzrudin Abdul Rahman meri terima kasih ngagai kompeni laban terus pechaya ke tim sida ti udah nerima pemeri nya kenyau ari taun 2023.
 
“Aku deka meri terima kasih ngagai Press Metal pechaya ke tim kami enggau nyaup sekali da taun tu,” ku iya lebuh aum media serimbai Pengawa Nyua Saup Belanja RM1 juta Ngagai KCFC ba siti hotel tebilang ditu kena Hari Dua.
 
Pengawa nya udah dipenyadi Sapit Tuai Pegawai Eksekutif Press Metal Ooi Beng Guan enggau Tuai Pegawai Eksekutif KCFC Iswandi Ali Hassan seraya dikemata Dato Fazzrudin.
 
Berebak enggau nya, Sapit Tuai Pegawai Eksekutif Press Metal Ooi Beng Guan nerang, raban sida deka terus nyukung tim nya dikena nyukung pemansang industri main enggau lumba lebih agi main bol ba Sarawak.
 
Iya ngarap ke KCFC deka terus nempa pemujur ari embing Dato Fazzrudin ti mujur bulih penuduk keempat ba musin nyin tadi.
 
"Kami pechaya KCFC deka terus ransing nyapai pemujur musin sekali tu ke alai Dato Fazzrudin madah ke tim nya udah bulih penuduk keempat musin nyin tadi.
 
“Aku nemu iya konservatif enggau ransing mai tim ngagai penuduk ketiga ba musin tu tang aku deka besampika pemujur lalu aku pechaya ke KCFC deka bulih penuduk ti manah agi,” ku iya. - EDISI UKAS