SERIAN: Sada indu deka terus didinga enggau dikenang ngambi enda ngelaungka peminta sida ti ulih mai ubah besai ngagai mayuh renggat atur pengawa.
 
Kaban Parlimen Serian Dato Richard Riot Jaem madah, sada indu enda rapas, tang deka terus didinga ungkup pengelantang rayat enggau pemansang menua.
 
“Sada indu kemaya hari ukai semina didinga ba renggat genturung pendiau aja, tang mega majak nyarih ba renggat atur gawa pelilih, nengeri sereta menua,” ku iya ba Pengerami Makai Lemai Ngintu 43 Taun Gerempung Raban Indu Sarawak (PPWS) & Biro Indui Kampung Rasau ba Balai Mayuhguna Kampung Rasau kena Hari Enam.
 
Iya madah baru, gerempung baka PPWS beguna endar laban ulih nyadi pelasar ngagai raban indu mantaika sada peminta enggau sadang penemu ba mayuh atur pengawa.
 
Nya alai, iya meransang gerempung nya terus ditegap enggau seruran regas bejalaika pangku pengawa ngemansangka komuniti.
 
Batang tuju ngatur pengerami nya ngaku enggau ngenang jasa kaban PPWS sekumbang gawa kelimpah ngerapitka kaul kaban baru enggau lama. -EDISI UKAS