KUCHING: Sekretari Perintah Sarawak, Datuk Amar Mohamad Abu Bakar Marzuki udah bejadika pengawa ninting bulan nikika tambai Ibu Pertiwi Edisyen Ogos ti diatur di Dataran Pertiwi, ditu kena Hari Minggu.
 
Baka selama, lambang dikemegah Ibu Pertiwi nya digitang enggau penuh adat basa.
 
Tambai 25 meter panjai enggau 12.4 meter pemesai nya digitang ba tiang peninggi 99.4 meter lambang semangat penaluk enggau penyerakup rayat mengeri ti nadai kala tendu.
 
Pengawa dipun enggau rintai basa raban Dewan Bandaraya Kuching Utara (DBKU) dientudi nyada lagu menua Sarawak, Ibu Pertiwi.
 
Pengawa sehari nya richah enggau pemerindang khas bepelasarka seni pesaka lokal ti mandangka pengelantang pupu bansa ba Tanah Kenyalang.
 
Pengawa nikika tambai Ibu Pertiwi nya inisiatif DBKU negap semangat penaluk enggau penyerakup ba rayat Sarawak.
 
Kenyau ari diatur bulan Julai 2024, pengawa nya udah nyadi program ninting bulan, enggau Premier Sarawak mungkal pengawa ba edisyen terubah.
 
DBKU ngangkatka pengawa nya nyadi pelasar mantaika penaluk ngagai menua nengah pengawa ngitang tambai Ibu Pertiwi ba tanda menua Mengeri Besai Kuching, lalu negapka semangat pengangkun enggau penaluk peranak ditu senutuk enggau juluk bala tuai nengeri.
 
Bela datai, Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam), Datuk Dr Abdul Rahman Junaidi, Sapit Sekretari Perintah Sarawak (Administrasyen), Datu Buckland Bangik, Datuk Bandar Dbku, Dato Hilmy Othman, bala tuai opis enggau temuai dipebasa bukai.-EDISI UKAS