SERIAN: Bala graduet Pelajar enggau Latih Teknikal enggau Vokasional (TVET) ti ngembuan pengelandik teknikal diperansang ngaul diri ba pengawa dagang.
 
Menteri Pelajar, Inovasyen enggau Pemansang Penau ti mega Kaban Kunsil Nengeri (ADUN) Tarat, Dato Sri Roland Sagah Wee Inn madah, sida patut ngena manah pengelandik diri sereta ngiga peluang kereja baru setipak enggau polisi Perintah Sarawak ngemansangka modal mensia ti ulih besemekih.
 
Ku iya, penau graduet TVET ukai semina bepanggai ba pengelandik teknikal aja, tang mega pemintar sida ngerembaika dagang ti meri empas ngagai ekonomi lokal.
 
“Program baka Hari Keusahawanan tu meri penemu tumu ngagai bala nembiak berunding baka ni ngepunka dagang enggau nyadi orang dagang.
 
“Aku ngarap ke graduet TVET ila ulih ngena manah pengelandik teknikal sida nyadi orang dagang ti nyulut,” ku iya lebuh bejadika Hari Keusahawanan 2025 SJK Chung Hua Batu 35, Serian, kena Hari Enam.
 
Tuju program diatur Kaunsil Pengatur Sekula SJK Chung Hua Batu 35 nya masuk edisyen kedua meri penerang tumu ngagai nembiak pasal konsep orang dagang, kelimpah meransang runding  kreatif enggau inovatif senutuk enggau pengawa ngelaku bidang Sains, Teknologi, Injiniring enggau Matematik (STEM) dipejalai Perintah Sarawak.
 
Sama datai, Sekretari Politik Premier Sarawak, Damen Rejek, Penghulu Philip Lee, Chairman Kaunsil Pengatur Sekula SJK Chung Hua Batu 35, Jennifer George Gantung, Pegawai Opis Pelajar Pelilih Serian enggau Kepala Pengajar SJK Chung Hua Batu 35, Chai Fui Chiew.-EDISI UKAS