ASAJAYA: Komuniti MADANI terus negap pangku pengawa nyadi penegap penyerakup enggau pengelantang rayat ba renggat baruh nengah Program JIWA Komuniti MADANI sereta Pengerami Tuai Begulai Enggau Rayat ti diatur richah di Dewan Panca Delima, SMK Hajjah Laila Taib ditu, kena Hari Enam.
 
Sapit Menteri Pemansang Menua Pesisir enggau Kandang Menua ti mega Kaban Parlimen Kota Samarahan, Datuk Rubiah Wang madah, program senutuk enggau juluk Malaysia MADANI ti dikemudi Menteri Besai, Datuk Seri Anwar Ibrahim, bepuguka nilai inklusiviti, penyerakup enggau pengelantang rayat.
 
Iya nyemetak madah, Komuniti MADANI ngesan pangku pengawa nabur penerang perintah ti betul enggau nemban ngagai rayat ba renggat baruh, kelimpah nagang pengawa ngerembai berita bula.
 
“Ku ripot Unit Perambu Ekonomi (EPU), menua ti regas bejalaika inisiatif Komuniti MADANI ngerikod manggai 40 peratus ba tikas pemereti rayat senentang polisi perintah kenyau ari 2023,” ku iya lebuh bejadika program diatur Opis Pemadah (JAPEN) Pelilih Samarahan nya.
 
 Bemacham isi program narit ati bela ngerichah program nya nyengkaum pemerindang Pentarama Komuniti, sesyen Randau MA63, nyadung kereban pemadah enggau sesyen begulai tuai enggau komuniti lokal.
 
Sama datai Sapit Direktor JAPEN Sarawak Sri Kestury Mohammed Zamhari, Pegawai Tadbir Khas (IRISDA) Anuar Da’an, Pegawai Pelilih Asajaya Jerry Zannuddin, Temenggong Melayu Bagi Menua Samarahan Chek Bujang enggau Prinsipal Sekula Sekondari (SMK) Hajjah Laila Taib Usti Dolhan. -EDISI UKAS