KUCHING: Pesaka budaya sereta identiti pupu bansa di Sarawak patut terus diintu enggau ditegap ngambi enda punas ditelan arus pemansang.
 
Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madah, Sarawak ngembuan 34 etnik ti udah digazet lalu bela bisi sejarah sereta nilai budaya ti nyelai.
 
Nya alai ku iya, pengawa mantai, ngintu enggau narak identiti tu, lebih agi ba rebak biak, patut diberi perati.
 
“Bisi sekeda nembiak kelalu kiruh bekenaka teknologi enggau ke bukai nyentuk sida nyau enda ingatka ni raban bansa ti bisi ba nengeri tu.
 
“Nya kebuah, udah nyadi pengawa kitai nentuka raban bansa tu disulur laban tu mih identiti kitai, identiti Sarawak,” ku iya rambau Pengerami Ngarom Bisamah Serakup Segu Bunuk Penrissen (PSBP) 2025 ba Balai Mayuhguna Serakup Bansa Dayak Bidayuh (DBNA), ditu kena Hari Enam.
 
Datuk Snowdan madah baru, pesaka budaya nyadi pugu besai nempa identiti nengeri ti mega nyadi pematak temuai ari menua tu enggau menua luar datai.
 
 “Lebuh temuai datai ke Sarawak, pekara keterubah ti deka dipeda sida iya nya raban bansa kitai laban kitai tu chukup nyelai – ari ngepan asal enggau budaya ti mayuh macham. Tu ti ngasuh kitai nyelai ba mata dunya,” terang iya.
 
Ari nya, iya meransang anak Sarawak ti diau ba luar nengeri baka Semenanjung Malaysia, Sabah tauka menua luar ngambi seruran mai identiti bansa diri empu nyadi kelai temegahka asal penatai diri.
 
 "Enti anak nya Bidayuh, tentuka iya mai ngepan asal Bidayuh. Enti Iban, bai ngepan Iban. Enti Orang Ulu, bai nama keresa ti mandangka bansa diri. Tu beguna endar ngambi sida ulih nunjukka sapa sida, lebih agi ba pengerami bebatang,” ku iya.
 
Ba pengerami nya, Datuk Snowdan mega ngemendarka agih belanja sepenyampau RM20,000 ngagai PSBP kelai sukung ngagai pengawa ngintu budaya enggau pengawa asal dia.
 
Seraya Kaban Parlimen Puncak Borneo ti mega Penaung PSBP, Datuk Willie Mongin ba jaku ngelalu minta serakup nya ulih bekerejasama enggau serakup bukai ngambi penyerakup tegap agi enggau kaul komuniti tau rapit.
 
“Enti serakup bukai nya sida nyau deka rebah, kitai tau mantu sida.
 
“Aku enggai meda serakup kitai semina bisi semangat ‘ransing enda lama aja’. Maya ditumbuh, kita chukup ransing, tang nyau kelama-lama, majak lenyau lalu tekelap. Kita meseti terus segulai sejalai enggau nyaup pangan diri,” ku lalau iya
 
Iya mega madah, bemacham program udah dipejalaika PSBP dikena mantu komuniti dia, tang iya ngaku agi tubah pengawa patut digaga.
 
“Kitai deka terus meras gawa, nyukung perintah enggau bejalaika pangku pengawa ba pemansang ekonomi enggau politik nengeri ngambi tanggungpengawa kitai nyadi komuniti terus diadu meruan,” ku iya.
 
Berebak enggau nya, iya meri terima kasih ngagai Sapit Menteri Pengangkut Sarawak ti mega Kaban Kunsil Nengeri (ADUN) Mambong Datuk Dr Jerip Susil ti udah ngemendarka agih belanja dikena nirika Palan Main Asal Serakup Segu Bunuk, enggau madah ke pengawa benung diatur dikena ngelala taba tanah ti engkeman.
 
“Kitai ngarap ke ari pemisi agih belanja tu, dudi hari, kitai bisi siti palan main asal kediri ti deka nyadi lambang pesaka enggau identiti bansa kitai,” ku iya nyemetak.-EDISI UKAS