KUCHING: Pemain Kuching City FC (KCFC) ditangkan enda terunda-runda enggau pemujur ngalahka The Real Warriors (TRW) FC mungkal kelang Liga Super Malaysia 25/26 malam tadi, tang patut besikap napi dua main ti deka diatur.
 
Penulung Jurulatih KCFC, Zulkarnein Mohamad Poasa madah, tim sida deka ngelaban Brunei DPMM ba main Piala FA kena 16 Ogos, sebedau nerima penatai champion 11 kali Liga Super, JDT kena 24 Ogos tu.
 
“Kitai endang dulu agi besikap ungkup Piala FA (ngelaban Brunei DPMM) baru nyikap diri napi JDT ila di Kuching. Kitai besikap nitihka tusun," ku iya ba aum media pengudah main tembu.
 
Zulkarnein mega muji gaya pemain KCFC malam nya bemain enggau chukup manah lalu ngalahka Kelantan, 4-0.
 
"Alhamdulillah, taja bisi sekeda pemain baru ti agi nebelabka diri tang ulih main enggau main.
 
“Sida bemain enggau chukup manah kelebih agi maya latih ke alai dua tiga hari tu sida nunjukka diri udah sedia,” ku iya.
 
Ba pekit nya, KCFC mujur ngalahka tim Kelantan 4-0 ari gol dipasuk Wanja Ronald Ngah ti nyipak dua gol seraya Joao Pedro enggau Ramadan Saifullah bela siti gol.
 
Zulkarnein madah baru, 11 pemain ti dikeluar malam nya nunjukka sida ulih bemain baka ti dikeandal tang mega muji pemain ti nyilih bela bemain enggau manah.
 
Ku iya, pemain simpan ulih bemain enggau bala bakih bukai laban pemain deka dipilih belalauka prestasyen ti ditunjuk maya belatih.-EDISI UKAS