KUCHING: Skuad Kuching City FC (KCFC) ngepunka kimpin Liga Super 25/26 enggau pemujur lebuh ngalahka Kelantan The Real Warriors (TRW) FC, 4-0 lebuh muka kelang ba Stadium Negeri, Petra Jaya, kena malam Hari Enam.
 
Tuai rumah enda nganti lama ngemudi main nya lebuh manuk sabung baru, Wanja Ronald Ngah nanduk bol lalu tama ke pintu gol ba minit ke-6 ari bol disipak Jimmy Raymond.
 
Pengilap penyaga pintu gol Kelantan, Muhammad Azfar Arif ti pansut jauh diukum pemain sayap KCFC, Joao Pedro Da Silva lebuh bol terus gol ba minit ke-16.
 
Tegepang enggau dua gol tuai rumah, tim Kelantan ngatur manah agi main lalu sekeda bol disipak nyau deka tama kubu KCFC.
 
Taja pia, KCFc chukup kebal sereta mar dikeruga penyerang TRW ngujungka tengan main jam keterubah tembu 2-0.
 
Betampung idar kedua, Kelantan bemain enggau berurun agi sereta suah nyerang kubu KCFC dikena ngurangka defisit gol.
 
Pengeransing pemain diembing Elavarasan Elangowan nya tetap puntan meri pemujur.
 
Tang Wanja sekali agi ngasuh Kelantan ransi ati lebuh masukka gol ketiga KCFC ba  minit ke-70 pengudah nyambut bol disipak Muhammad Ramadan Saifullah.
 
Muhammad Ramadan ngenapka malam pegari KCFC enggau gol keempat ba jam bakal (90+3).
 
Sama datai meda main nya, Sapit Menteri ba Opis Premier Sarawak (Hal Ehwal Korporat, Pemadah enggau UKAS) Datuk Abdullah Saidol sereta Chairman Kuching City FC ti mega Tuai Sekretari Politik Premier Sarawak Dato Fazzrudin Abdul Rahman. -EDISI UKAS