MIRI: Perintah Sarawak terus negap agenda transformasyen digital nenga bemacham inisiatif bepuguka artificial intelligence (AI) ti dipejalai nyengkaum numbuh Palan AI Sarawak ti deka nyadi penyungkak pemansang teknologi nya ba nengeri tu.
Menteri Dagang Temuai, Industri Kreatif enggau Seni Pemerindang Sarawak ti nyadi Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, Palan AI Sarawak deka ngemudi integrasyen AI ba infrastruktur digital nengeri nengah kerejasama strategik begulai enggau institusyen akademik, industri enggau agensi perintah.
“Siti ari inisiatif besai Palan tu iya nya program 'AI ungkup Betanam Betupi Pintar', ti ngena analitik data bekuasa AI ngambi asil utai tanam optimum enggau narak pemeruan ba pengawa betanam betupi.
“Palan tu mega mungkal projek ba bidang pengerai baka analitik prediktif dikena nyidi tumu penyakit enggau nambahka penyikar kuasa nengah sistem grid pintar ti diatur AI,” ku iya.
Iya nibar ke jaku nya nengah teks jaku dibacha Datuk Bandar Bandaraya Miri ti mega ADUN Pujut, Adam Yii Siew Sang ba Pengawa Nangguh Woksyop Pintar AI SABERKAS Zon Utara di Kompleks Islam Sarawak, ditu kena Hari Enam.
Dato Sri Abdul Karim madah, inisiatif pemansang penau AI mega dipejalai ari numbuhka Unit AI ba servis perintah sereta penumbuh Palan Data AI, senutuk enggau pengawa ngangkatka Sarawak nyadi hab teknologi tinggi ba rantau Asia Tenggara.
Iya mega nyemetak madah ke pemesai guna AI ba sektor administrasyen nyengkaum automasyen pengawa ninting hari, analitik data, nambah peneleba penguna enggau pengelikun siber ti entap agi.
Ku iya, pengawa bekenaka AI ulih ngelimat jam, ngurang ungkus operasyen sereta nambah atur administrasyen ti betul.
Iya mega bisi ngenang pasal pemujur Sarawak ngemansangka KETEQ AI, iya nya peranti penukar kuasa bepuguka AI keterubah ba dunya ti ditengkebang Anak Sarawak empu ba baruh Pelin Tunga Kuing Semikonduktor Sarawak 2030.
“Sarawak ukai semina ransing nyapai penyulut aja, tang ngangkatka diri nyadi rantau menua ti diaku ba tikas global ungkup inovasyen, pemansang teknologi enggau pemansang meruan ti enda ngelaungka komponen besai strategi nya nyengkaum ngatur data ti tegap enggau nempa rampa digital ti likun. Tu deka ngelindung integriti enggau privasi sistem di Sarawak,” ku iya.
Berebak enggau nya, Dato Sri Abdul Karim nangkan bala nembiak bisi tanggungpengawa lebuh ngena teknologi AI lalu enda nyadi ‘jalai puntang’ ba belajar laban nembiak ba sekula enggau universiti majak mayuh ngena teknologi nya.
“Penemu ti diulih ari pengawa kita empu besai agi reti dibanding diulih chara belalai ti semina sementara aja. AI tu kereban mantu, ukai nyilih runding kritis mensia,” ku iya nyemetak.
Iya meransang bala penyereta ngena AI ari pemintar runding, ngerembai penemu ti diulih enggau mantu perintah narak budaya bekenaka teknologi nya ungkup pemaik begulai.
Lebih 60 penyereta datai ari kaban SABERKAS enggau serakup nembiak Zon Utara udah ngulu pengawa nangguh woksyop diatur SABERKAS Sarawak enggau kerejasama SABERKAS Pampang Pujut nya.
Woksyop nya mungkur sesyen penerang enggau mantai jurai ari mayuh raban nyengkaum CENTEXS, A.K. Resources, i-CATS, TEGAS, Maxis, enggau Zeitgeist Inspira Technologies Sdn. Bhd.-EDISI UKAS
