MIRI: Budaya pemakai meruan enggau regas patut ditarak ngagai rayat nentuka sida bela gerai batang tubuh, runding enggau kaul sosial.
 
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, rambai jaku ngintu Bulan Pemakai Malaysia enggau Minggu Nusu Ba Indai taun tu iya nya “Makai Meruan, Regas – Beratika Pengerai enggau Pengelantang” senutuk endar enggau pengawa nyeridi enggau narak gaya idup gerai dalam komuniti.
 
“Tu peransang ngagai semua komuniti ngambi meri perati ngagai gaya makai enggau aktiviti pengeregas tubuh ungkup pengelantang batang tubuh, runding enggau kaul rama ti sebela,” ku iya lebuh bejadika Bulan Pemakai Malaysia Renggat Nengeri Sarawak enggau Minggu Nusu Ba Indai Sedunya Renggat Bagi Menua Miri Taun 2025, ti diatur ba Bintang Megamall, ditu Hari Enam.
 
Ngenang silik, Dato Sri Fatimah nibak asil Tinjau Nasional Pengerai enggau Morbiditi (NHMS) ti dipejalai betimpuh ba renggat nasional nyadi malin mereti ke status pengerai rayat.
 
Ku iya, NHMS 2024 meri perati khas ngagai sukut pemakai, lalu mantu Opis Menteri Pengerai Malaysia (KKM) ngelala seraka enggau isu bekaul pemakai ba menua tu.
 
“Bemalinka NHMS, prevalens tubuh kelalu berat enggau obesiti ba orang besai tuai di Sarawak nambah ari 48.5 peratus ba taun 2015 ngagai 53.3 peratus ba taun 2023.
 
“Reti nya, lebih setengah ari penyampau tubuh orang besai tuai tau ditepan penyakit enda berampit baka diabetes, darah tinggi enggau penyakit tungkul atau,” terang iya.
 
Iya madah baru, penanggul tu bepun ari gaya makai enda setipak enggau guna tubuh, lebih agi makai pemakai ngundan kalori ti kelalu mayuh ari gula tambah.
 
“NHMS 2024 tetemuka 63.1 peratus nembiak enggau 47.0 peratus orang besai tuai di Malaysia ngambil gula kelalu mayuh ari pematut dalam sehari, lalu setengah ari nya datai ari pemakai begula,” ku iya.
 
Nya alai ku Dato Sri Faatimah, perintah bejalaika atur neritka chukai ba ai irup beguna kenyau ari taun 2019.
 
Ku iya, belabuh 1 Januari 2025, penyampau chukai nya ditiki RM0.90 seliter, seriris enggau jaku lalau Gerempung Pengerai Sedunya (WHO) nentuka nyapai tuju abis nadai kusut 20 peratus ngambi gula ngena mekanisme rega.
 
Iya mega madah, pengawa nya disukung ari pejalai Pelin Strategik Ngurangka Gula Ba Rayat Malaysia 2024-2030 ti negapka chara entara sektor enggau intervesnyen inklusif.
 
Dato Sri Fatimah mega minta rayat meresa pemakai enggau pengerai diri nadai bebayar ti disedia ba fasiliti pengerai peritah dikena nagang tumu.
 
 Iya nyemetak madah ke asil tinjau NHMS deka nyadi malin pengawa advokasyen pemakai ari KKM enggau Opis Pengerai Nengeri Sarawak ti deka terus ditegap ngena chara praktikal agi enggau ngelantangka rayat.
 
Sama datai, Direktor Opis Pengerai Nengeri Sarawak Dr. Veronica Lugah, Pegawai Pengerai Bagi Menua Miri Dr. P. Raviwharmman Packierisamy, Menijar Kandang Menua Pustaka Negeri Sarawak Miri Razak Rambili enggau Duta Nusu Ba Indai Bagi Menua Miri ti mega Chairperson Gerup Sukung Nusu Ba Indai Bagi Menua Miri Dayang Normaliza Awang Tambi.-EDISI UKAS