SIMANGGANG: Leonard Libau Anal, 63, mujur dipadu nyadi temenggong komuniti Iban Bagi Menua Sri Aman pengudah nerima surat chiri ari Residen Bagi Menua Sri Aman, Mahra Salleh ba siti program mit ti diatur di Opis Residen Bagi Menua Sri Aman ditu, kena Hari Lima.
 
Sapit Menteri Pelajar, Inovasyen enggau Pemansang Penau Sarawak ti mega Kaban Kunsil Nengeri (ADUN) Simanggang, Datuk Francis Harden Hollis bisi datai ngemata pengawa nyiri nya.
 
Pengawa nyiri Leonard nyadi temenggung nya berengkah diterit kena 1 Julai 2025 nyentuk 31 Disember 2029 ungkup timpuh keterubah lalu pengawa nampung servis gawa bepanggai ba pemutus Komiti Panel Milih Tuai Komuniti enggau Tuai Raban Bansa (KMKK) Bagi Menua.
 
Nangkan nya, pengawa nyiri nya disadang negap pangku pengawa tuai komuniti dikena nyaga pengelantang enggau nyungkak pemansang komuniti Iban di bagi menua Sri Aman.
 
Bela datai meri sukung nyengkaum bala tuai komuniti ari bemacham komuniti nyengkaum Temenggong Mohd Shah Achang, Temenggong Kueh Aik Seng, Pemancha Lee Siang Hua, Pemancha Denneil Saweng, Pemancha Abang Noring Abang Norudin, Penghulu Andar Suntai, Penghulu Tiong Chong Onn, Penghulu Empaga Bailey sereta Penghulu Kang Tai Kong. – EDISI UKAS