SIBURAN: Peranak menua tu diperansang nyadi ejen ngubah ekonomi komuniti ari ngena manah penemu enggau pengelandik ti diulih.
 
Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn nyemetak madah ke pengelandik ti dipelajar ukai semina ulih nambah belanja ba ruang bilik aja, tang ngasuh komuniti menua pesisir ulih besemekih enggau meransang ekonomi tumbuh meruan.
 
Kaban Kunsil Nengeri (ADUN) Tarat nya nerang, pelajar pengelandik beguna endar dikena meri peluang kedua ngagai raban orang tuai ti enda besekula ngulihka penemu enggau pengelandik dikena ngangkatka tikas idup enggau negap komuniti.
 
Iya madah munyi nya lebuh bejadika Pengawa Bejadi Kus Pengelandik Quickwin Anta Profesional diatur KEMAS Parlimen Puncak Borneo Taun 2025, ba Dewan Serbaguna Kampung Lintang Baru ditu kena Hari Lima.
 
Sama datai, Sekretari Politik Premier Sarawak, Damen Rejek, Direktor KEMAS Nengeri Sarawak, Anisah Saidin sereta bala pegawai bukai.
 
Dato Sri Roland Sagah madah, kus ti diatur nya nipakka juluk perintah ngemansangka modal mensia enggau orang dagang.
 
Iya nerang, tuju kus nya ngenapka pengelandik ti dipelajar ba kelas ti disedia, meri peluang raban diselinting nambah pengelandik lebih agi ba anta profesional ti bisi makit besai, kelimpah ngemayuh bansa penatai pemisi ngambi sida ulih ngiga belanja tambah ungkup diri sebilik.
 
Berebak enggau nya, kus tu mega dikearap ulih nempa orang dagang pemungkal ba kategori PICO, NANO enggau MIKRO ti ulih besemekih chara progresif ba makit lokal tauka menua luar.-EDISI UKAS