KUCHING: Kaunsil Adat Istiadat Sarawak (MAIS) ulih nempa pemujur baru ngadu pengawa nyagu pesaka Orang Asal.
 
Menteri ba Opis Premier Sarawak, Dato Sri John Sikie Tayai madah, pengawa numbuh palan khas nya nyadi pengawa strategik ti engkeman ba maya, nentuka pengawa ngintu, ngemansang enggau narak adat sereta budaya Orang Asal Sarawak ulih diatur berurun agi, profesional enggau besai empas.
 
“Aku nyukung tegut perambu numbuhka MAIS Adat, Culture enggau Traditions Centre.
 
"Udah umbas endur MAIS bejalaika pangku pengawa ti entap agi dikena negapka pengawa ngintu adat enggau budaya ti ukai semina nyadi identiti nengeri tu, tang reta berega ngagai pemansang Sarawak,” ku iya.
 
Iya nibar ke jaku nya lebuh bejadika Program Hari Inovasyen MAIS 2025 enggau Pengawa Ngelanchar Lima Bup ti diatur ba Hotel Waterfront, Kuching kena Hari Lima.
 
Dato Sri John madah baru, inisiatif nya diperati senutuk enggau juluk Strategi Pemansang Pengudah COVID-19 (PCDS) 2030 ti nyelinting transformasyen rayat Sarawak nengah inovasyen, serungkai sosial enggau pemansang meruan.
 
“Nya alai, kaul MAIS meri penemu kreatif enggau inovasyen sereta pengawa ngeluarka bup asil pansik enggau karang pasal adat, budaya enggau tradisyen Orang Asal di Sarawak chukup engkeman enggau nipakka pangku pengawa MAIS ti ngintu enggau narak adat, budaya enggau tradisyen Orang Asal di Sarawak, lebih agi rebak biak,” ku iya.
 
Perambu numbuhka rumah adat nya diparit pengawa ngeluarka lima bup bekaul adat enggau budaya ti dilanchar kemari, ti ngenang pasal budaya Bidayuh enggau Melanau – mandangka pengeransing MAIS ngadu dokumentasyen pesaka nengeri.
 
Ari sukung tegut perintah nengeri enggau penau MAIS ti majak entap, pengawa numbuhka palan nya dikeandal ulih nyagu pesaka Sarawak ba dunya moden ti majak mayuh pemar.-EDISI UKAS