SELANGAU: Perintah Sarawak ransing ngenegap pelajar Sains, Teknologi, Injiniring enggau Matematik (STEM) sereta Pelajar enggau Latih Teknikal enggau Vokasional (TVET) nyadi sebagi ari pelin besai dikena ngemansangka modal mensia landik di nengeri tu.

Menteri ba Opis Premier Sarawak, Dato Sri John Sikie Tayai madah peresa baru deka dipejalai ungkup nembiak Primari 6 ba subjek Matematik, Sains enggau Jaku Inggeris ngambi nemu tikas akademik sida.

“Pengawa tu setipak enggau juluk Perintah Sarawak ti deka nisih pengulih sereta pemujur nembiak ba renggat tumu.

“Taja pan nadai agi UPSR tauka PMR, kitai ngena siti chara dikena berati ke pemujur sistem pelajar kitai, lebih agi ba menua pesisir,” ku iya.

Iya madah munyi nya maya ngenataika jaku pengelalu serimbai Pekit Lumba Ninting Taun SK Sungai Anak 2025, kena Hari Empat tu tadi.

Berebak enggau nya, iya ngelalau ngambi apai indai, bala pengajar enggau pengari rayat nyaup pejalai peresa nya ungkup penyulut pelajar anak Sarawak dudi hari.

Nerang silik, Dato Sri John Sikie madah pengeransing ngenegap bidang STEM enggau TVET besai guna ngambi tetangkupka peminta pengereja landik, lebih agi ba kandang menua industri baka Bintulu.

Ba program sama, Dato Sri John Sikie ngungkup RM10,000 nengah belanja Projek Mit Pemansang Menua Pesisir (MRP) ngagai Gerempung Apai Indai enggau Pengajar (PIBG) SK Sungai Anak dikena nyaup program pelajar enggau pemansang nembiak sekula nya.- EDISI UKAS