KUCHING: Sarawak enggau Denmark nyerungkai pengulih kerejasama ba bidang pengangkut gadung enggau kuasa meruan nyadi sebagi ari pengeransing ngenegap agenda pemansang meruan nengeri tu.

Duta Denmark ke Malaysia, Kirstine Vangkilde Berner, ngatur penemuai basa ngagai Menteri Pengangkut Sarawak, Dato Sri Lee Kim Shin, dikena berandauka kerejasama R&D ba teknologi hidrogen, minyak bilun meruan (SAF) enggau inovasyen pengangkut karbon beresi di Sarawak.

Dato Sri Lee ba pengawa betemu nya bela bekunsi pemansang projek Transit Aliran Autonomi (ART) ari baruh Sistem Transit Mengeri Kuching (KUTS) iya nya, sistem keterubah baka nya di Malaysia ti bekenaka kuasa hidrogen, lalu mandangka pengeransing Sarawak ngenegap pengangkut bepelasarka kuasa beresi.

Iya mega madah bekaul langgur pengawa ngaga Padang Bilun Antarabansa Kuching ti baru nyadi pintu penama moden enggau penyungkak ekonomi serantau.

Duta Denmark mega madah ke saup sida enggau juluk ati pemansang Sarawak ti ngemerat pemeruan rampa menua lalu madah ke menua sida iya sedia nanggam kerejasama ba pekara mindah teknologi sereta bekunsi pengelandik dikena nempa Sarawak nyadi pemekuh pengangkut gadung di rantau tu.

Bela datai ba penemuai nya, Sapit Sekretari Mendam Opis Menteri Pengangkut Sarawak, Selamat Jati Yanjah enggau Penyanding Penemu Teknikal Penerebai, Sio Yew Hua.-EDISI UKAS