KUCHING: Komiti Besai Nagang Penyalah Makai Suap Malaysia (SPRM) majak ransing munas penyalah makai suap sereta nyungkak integriti atur perintah nengeri nengah kerejasama rat begulai enggau Perintah Sarawak.
Tuai Komiti Besai SPRM, Tan Sri Azam Baki madah, sida chukup beterima kasih ke sukung tegut bala pemesai nengeri, lebih agi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nentuka agenda integriti enggau atur perintah ti manah mujur dipejalai.
“Perintah nengeri meri sukung tegut ngagai SPRM Sarawak lebih agi ba pengeransing kitai deka nyungkak integriti enggau munas penyalah makai suap di Sarawak lalu aku meda mayuh inisiatif ari Perintah Sarawak ransing nyungkak integriti lebih agi enggau Ombudsman ke ditumbuh ba Sarawak tu.
“Aku endang nyukung pengawa numbuhka ombudsman tu ke pemaik perintah enggau rayat Sarawak mega.
“Pengawa kami ke bukai pan endang bulih sukung lalu nadai penanggul ari Perintah Sarawak ba pekara bekaul pansik sereta kebukai.
“Nya alai, sebagi ari pekara ti dikemerat Premier Sarawak, iya madah kitai terus bejalaika pengawa mansik lebih agi ba orang gawa perintah ti ngereja penyalah makai suap enggau salah guna kuasa di nengeri Sarawak,” ku iya.
Iya madah munyi nya maya dirandau media pengudah ngatur penemuai basa ngagai Premier Sarawak di Kompleks Satria Pertiwi ditu, Hari Lima.
Tan Sri Azam mega madah, entara kes ti suah dipansik di Sarawak bekaul salah guna kuasa, penyalah makai suap bekaul projek sereta peminta bula ti ngeruga pekara wang nengeri lalu ngeruga pengelantang rayat.
Ku iya nerang, pengawa salah nya nyadi lebuh projek enda tembu, enda digaga lalu tauka enda nitih standard lalu meri empas ngagai rayat, nyengkaum penusah bebadi tauka pengerugi infrastruktur.
Iya mega nyemetak madah SPRM diatu merati pendiau orang bepangkat besai sereta deka ngambi pulai aset ti diulih ngena chara belalai nyengkaum di Sarawak.
Nerang bekaul Ombudsman Sarawak, Tan Sri Azam madah ke diri nyukung kaunsil nya ditumbuh ke semina siti nya aja di Malaysia sereta nyadi kaunsil ke matau atur perintah.
Iya madah, tikas kes makai suap di Sarawak enda entu ngirau ke ati, enggau iring tuai nengeri ti ngembuan politik ti manah dikena nentuka semua pangku pengawa mujur dipejalai.
Bela datai, Sekretari Perintah Sarawak Datuk Amar Mohamad Abu Bakar Marzuki, Direktor SPRM Sarawak Hasbillah Mohamad Salleh sereta raban pegawai kanan SPRM ke bukai-EDISI UKAS
