LUNDU: Kaban Kunsil Nengeri (ADUN) Opar, Billy Sujang ngabas sekeda projek ari baruh Program Transformasyen Menua Pesisir (RTP) ke benung dipejalai di Kampung Bokah, Kampung Senibong enggau Kampung Titiakar, kena Hari Empat tu tadi.

Tuju pejalai nya dikena meresa kepenudi status pejalai projek RTP ti benung dipejalaika Opis Entali Ai enggau Parit (JPS) Bagi Menua Kuching.

Sekeda ari projek diabas baka Projek Ngaga Baru Jalai Kebun Punggu Penoak di Kampung Bokah beungkus RM150,000, ti dipelaba deka ngemuntangka jalai komuniti pekebun ngagai kebun sereta nambah asil betanam betupi sida.

Kelimpah ari nya, Billy mega ngabas Projek Ngerawang Sistem Parit di Kampung Senibong beungkus RM150,000 enggau Kampung Titiakar beungkus RM50,000.

Ku Billy, projek tu dikearap ulih mutar isu parit sereta ngurangka isu bah ti seruran ditapi peranak menua maya musim pengujan.

Nya alai, ku iya, pengawa matau chukup beguna dikena nentuka tetiap projek mujur dipejalai lalu meri pemaik ngagai rayat.

“Nyadi pengari rayat, aku deka terus matau pejalai projek pemansang ngambi nadai pengelaun sereta semua belanja ti diberi dikena manah ungkup pengelantang rayat ba kandang menua pesisri,” ku iya lebuh dirandau pengudah ngabas projek nya. -EDISI UKAS