DALAT: Menteri Pemansang Indu, Nembiak Mit enggau Pengelantang Komuniti Dato Sri Fatimah Abdullah udah ngabas sekeda taba projek pemansang ba sitak Dalat, kena Hari Empat tu tadi.

Kaban Kunsil Nengeri (ADUN) Dalat nya ngepun ke pejalai ngelawa Kampus Palan Penyulut Teknikal Sarawak (CENTEXS) Dalat, ti disadang nyadi hab latih teknikal enggau vokasional besai ba kandang menua pesisir lebih agi dikena nambah peluang pelajar enggau pengelandik ba raban nembiak.

Nangkan nya, Dato Sri Fatimah ngabas pejalai projek Palan Ngaga Sum Organik Dalat (Teparok), ti nyadi sebagi ari inisiatif meransang pengawa betanam betupi meruan lalu deka ngena teda betanam betupi menua nya ngaga sum organik ke bisi kualiti, lalu nyaup nambah produktiviti betanam betupi meruan.

Pejalai nya diterus ngagai sekeda projek ari baruh Program Transformasyen Menua Pesisir (RTP) ti benung chakah dipejalai ti ngemanah infrastruktur pemun enggau pengelikun mensia mayuh dikena ngangkatka tikas pemanah pengidup peranak menua.

Sekeda ari projek ti diabas, nyengkaum pengawa ngaga sapat di Sekula Primari Kut Tengah, ti diperambu dikena mutar penanggul ampuh bah ke seruran nyadi ti ngeruga pengelikun nembiak sereta staf sekula.

Kelimpah ari nya, Dato Sri Fatimah bela ngabas palan projek ngaga sapat ba Nanga Sungai Ud Renggat Keterubah, alai projek tu deka meri empas positif ngagai pengelantang rayat, lebih agi maya musim pengujan enggau ai pasang raya.

Sama datai, Sapit Sekretari Perintah Sarawak (Administrasyen) Datu Buckland Bangik, Residen Bagi Menua Mukah Datu Kueh Lei Poh enggau Pegawai Pelilih Dalat, Mathew Hubert.-EDISI UKAS